कोरोनाभाइरस (कोभिड–१९)बारे सामाजिक सञ्जालमा फैलाइएका अफवाहबाट सजग रहन प्रेस नेपालले सुझाव दिएको छ। आइतबार विज्ञप्तिमार्फत् प्रेस नेपालले कोरोनाभाइरसका संक्रमणबाट जोगिन सुझाइएका स्वास्थ्यसम्बन्धी उपायहरु अवलम्बन गर्न अनुरोध गर्दै भ्रमबाट प्रभावित नहुन सुझाव दिएको हो।
‘अत्यावश्यक नभएसम्म भीडभाडमा नजाने, जानैपरे माक्सको अनिवार्य प्रयोग गर्ने, घरमा वा घरबाहिरबाट आएर अनिवार्य साबुनपानी वा सेनिटाइजर प्रयोग गरेर हातमुख धुने तथा शारीरिक स्वाथ्यमा ध्यान दिन अनुरोध गर्दछौं’, विज्ञप्तिमा सुझाव दिइएको छ।
समाजवादी पार्टीनिकट मानिएको प्रेस नेपालका महासचिव विजय चामलिङद्वारा जारी विज्ञप्तिमा सकेसम्म घरमै बसेर काम गर्न र फिल्डमै जानुपर्ने अवस्थामा सुरक्षित तवरले रिपोर्टिङ गर्न पनि आमपत्रकारकालाई अनुरोध गरेको छ। विज्ञप्तिमा कोरोना भाइरसबाट सतर्कता र सावधानी अपनाउन आम सर्वसाधारणमा अपिलसमेत गरेका छन्।
विज्ञप्तिमा कोरोनाभाइरसबारे आम सर्वसाधारणमा भ्रम सिर्जना हुनेखाले समाचार प्रकाशित नगर्न पनि भनिएको छ। ‘तथ्य र प्रमाणित भएका सूचनाका आधारमा मात्र समाचारजन्य सामाग्रीहरु प्रकाशन प्रशारण गर्ने विषयमा पनि गम्भीर हुन प्रेस नेपाल अनुरोध गर्दछ’, विज्ञप्तिमा भनिएको छ।
साथै, सरकारसँग जोखिम न्युनीकरणका लागि थप प्रभावकारी कदम चाल्न माग पनि गरेको छ। प्रेस नेपालसँग सम्बन्धित सबै कार्यक्रम, गतिविधि, बैठक, भेलालगायत कार्यहरु हाललाई स्थगित गरिएको समेत जनाइएको छ।
