सुवाष कर्ण धनुषाकाे
क्षिरेश्वरनाथ महेन्द्रनगरमा निर्माणाधिन सर्पदंश उपचार केन्द्रको सरोकारवाला निकायहरुद्वारा संयुक्त अनुगमन गरेको छ ।
शुक्रवार प्रमुख जिल्ला अधिकारी प्रदीपराज कणेल, जिल्ला समन्वय समितिका पदाधिकारी, क्षिरेश्वरनाथ नगरपालिकाका मेयर योगेन्द्र पजियार, नेपाली सेनाका अन्जन रुपाखेती, नेपाल रेडक्रस सोसाइटी धनुषाका अध्यक्ष नरेश सिंह, गैसस प्रदेश २ का धिरेन्द्र सिंह र पत्रकार सहित सरोकारवाला निकायहरुले अनुगमन गरेका हुन ।
यूएनडीपी र क्षिरेश्वरनाथ नगरपालिकाको आर्थिक र प्राविधिक, नेपाली सेनाको मानवीय तथा सिआईसीको प्राविधिक एवं व्यवस्थापन सहयोगमा निर्माण भइरहेको सो सर्पदंश उपचार केन्द्रको भवन निर्माण कार्य करीब ८० प्रतिशत सम्पन्न भइसकेको र उपचार सहितका प्रविधि सामाग्री खरीदका लागि टेण्डर भइसकेको अनुगमनको क्रममा सिआईसीका संजय साहले जानकारी गराए ।
सीआईसीको स्थानीय सहयोगमा निर्माण भइरहेको सो सर्पदंश उपचार केन्द्रको अनुगमनको क्रममा धनुषाको प्रमुख जिल्ला अधिकारी प्रदीपराज कणेलले भेन्टीलेटर र आईसीयूको सुविधा समेत राख्न सुझाव दिए ।
सो अस्पतालमा अनुसन्धानको रुपमा रहेका मिथिला वल्र्ड लाईफ ट्रस्टका अध्यक्ष देवनारायण मण्डलले धनुषामा सर्पदंशको वर्तमान अवस्था बारे तथ्यांक सहित जानकारी गराएका थिए । मेयर पजियारले चैतसम्म भौतिक पुर्वाधारदेखि प्राविधिकसम्मको सबै कार्य सम्पन्न गरेर बैशाखदेखि संचालनमा ल्याउने जानकारी दिए ।
जिल्ला समन्वय समितिका उपाध्यक्ष दिपक झाले अनुगमनको प्रतिवेदनमा परियोजनाको सम्पूर्ण जानकारी सहितका पुस्तिका तयार पारेर सम्बन्धित निकाय र जिससमा समेत पठाउन सुझाव दिएका थिए ।
धनुषा जिल्ला सहित छिमेकी जिल्लाका सर्पदंश प्रभावित व्यक्तिहरुको उपचार र अनुसन्धान केन्द्रको रुपमा निर्माण भइरहेको सो उपचार केन्द्रको निर्माण अवधि मार्च २०२० सम्म रहेको छ । निर्माण पश्चात पुर्ण व्यवस्थापन भइसकेपछि स्थानीयको सहभागितामा गठित व्यवस्थापन समितिद्वारा संचालनमा ल्याइने जानकारी गराइयो ।
दुई करोड ५९ लाख भन्दा बढीको लागतमा निर्माण भइरहेको सो उपचार केन्द्र परियोजना निर्माणका लागि यूएनडीपीले एक करोड, ५३ लाख ८६ हजार र नगरपालिकाले ९६ लाख ४५ हजार रुपैया आर्थिक सहयोग गरेका छन । भौतिक निर्माण पश्चात संचालनका लागि शुरुमा नगरपालिकाले १५ लाख रुपैया दिने छ भने प्रत्येक वर्ष १० लाखको दरले रकम उपलब्ध गराउने छ
