विन, मलाह, लोहार ,पटवा, विल्टाउ, र गोढया थर भएकाले दलित भत्ता नपाउने

गोपाल झा
श्रावण २१ गते
राष्ट्रिय परिचयपत्र तथा पञ्जिकरण विभागले सूचना जारी गर्दै नेपालमा बसोबास गर्दे आईरहेका पटवा, विल्टाउ, विन मुखिया, मलाह(सनही),लोहार र गोढया लगायतका जात/थर भएका व्यक्तिले अब दलितका रुपमा सामाजिक सुरक्षा भत्ता नपाउने भएका छन् ।
राष्ट्रिय परिचयपत्र तथा पञ्जिकरण विभागले बुधबार एक सूचना जारी गर्दै यी जातिहरु दलित जातीय अनुसूचीमा सूचिकृत नभए कारण भत्ता नदिन सबै स्थानीय तहलाई निर्देशन दिएको हो ।
बिगत देखी दलितमा सुचिकृत नभए पनि पटवा, विल्टाउ, विन(मुखिया), मलाह(सनही),लोहार र गोढया थर भएका व्यक्तिहरुलाई देशै भरका अधिकांश स्थानीय तहले सामाजिक सुरक्षा भत्ता दिँदै आएका थिए । यता केही स्थानीय तहले भने भत्ता दिने कि नदिने भनेर सुझाव मागेका थिए ।
स्थानीय तहहरुले यी जातहरुलार्ई सामाजिक सुरक्षाभत्ता दिने कि नदिने भन्ने अन्यौलमा रहेको भन्दै विभागमा राय सुझाव माग गरेपछि सूचना जारी गरिएको विभागका सामाजिक सुरक्षा शाखाका निर्देशक सागरमणि पाठकले जानकारी दिए ।
‘यस अगाडी उक्त जात/थर भएकाहरुलाई स्थानीय तहहरुले सामाजिक सुरक्षा भत्ता दिइरहेका थिए, हाम्रो रेकर्डमा पनि भत्ता दिइरहेको भन्ने थियो । केहिले दिने, केहिले नदिने भइरहेको अवस्थामा राष्ट्रिय दलित आयोगले आयोगमा सूचिकरण भएका समुदायलाई मात्रै भत्ता दिनु भनेपछि हामीले यो सूचना निकालेका हौं,’ पाठकले भने ।
बिभागले सुचना जारी गरेपछी एकडारा गाँउपालीकाको पञ्जीकरण/सेवा इकाई शाखाले मुखिया, विन,पटवा, बिल्टाउ, मलाह आदिलाई भत्ता दिन नमिल्ने पत्राचार भएकोले सोही अनुसार उक्त जातीहरुलाई नविकरण तथा नयाँ दर्ता नगर्न सबैमा जानकरी गराएको छ ।
सामाजिक सुरक्षा भत्ता वितरण कार्यविधि, २०७७ ले राष्ट्रिय दलित आयोगको दलित जातीय अनुसूची विवरण बमोजिमका जात/थरका व्यक्तिलाई दलित जाति अन्तर्गत उपलब्ध गराउने सामाजिक सुरक्षा भत्ता प्रदान गर्ने व्यवस्था गरेको छ ।