महन्थ ठाकुरसँग पार्टी कार्यालयमै वार्ता गर्ने आन्दोलनकारीहरूको अडान

लोकतान्त्रिक समाजवादी पार्टी नेपाल (लोसपा) को बबरमहलस्थित केन्द्रीय कार्यालयमा धर्ना बसेका पार्टीका असन्तुष्ट पक्षसँग मंगलबार पनि वार्ता हुन सकेन । लोसपाका अध्यक्ष महन्थ ठाकुरले विभिन्न जिल्लामा आफू खुशी मनोनयन गरेकाले निर्णय सच्याउनु पर्ने माग गर्दै विभिन्न जिल्लाबाट कायकर्ताहरु आइतवारदेखि धर्नामा बसेका छन् ।
अध्यक्ष ठाकुरले वार्ताका लागि असन्तुष्ट पक्षमध्ये ५ जनालाई आफ्नै निवासमा बोलाएका थिए । तर, उनीहरु निवासमा जान नमानेर आज पनि धर्नालाई निरन्तरता दिएका छन् । लोसपाका असन्टुष्ट नेता संजय सिंहले आफूहरु पार्टी कार्यालयमा धर्ना बसेकाले कसैको निवासमा वार्ताका लागि नजाने बताए ।
उनले भने, ‘विचार गर्नुपर्ने कुरा हो, पार्टीका यत्रा नेताहरु तीन दिनदेखि कार्यालयमा धर्ना बसिरहेका छन् । तर, पार्टीका अध्यक्ष वार्ताका लागि निवासमा बोलाइ रहनु भएको छ । यो कुरा हामीलाई स्वीकार्य हुँदैन ।’ आफूहरु पार्टी कार्यालयमा धर्ना बसेको कारण यही सामूहिक वार्ता हुनुपर्ने उनले जिकिर गरे ।
लोसपाका अध्यक्ष ठाकुरले पछिल्लो समय जिल्ला तथा प्रदेशमा गरेका मनोनयन एकलौटी भएको, पार्टीको विधि र पद्धतिअनुसार नभएको भन्दै पार्टीका वरिष्ठ नेता राजेन्द्र महतो पक्षका नेताहरुले आन्दोलन गर्दै आएका छन् ।
अध्यक्ष ठाकुर पुस ११ गते कपिलवस्तुको कार्यक्रम सकाएर काठमाडौं फर्केका हुन् । कार्यक्रमबाट फर्केलगत्तै उनी अस्वस्थ्य भएको कारण पार्टी कार्यालय जान असमर्थ रहेको उनको निजी सचिवालयले जनाएको छ । त्यस्तै, पार्टीका वरिष्ठ नेताद्वय राजेन्द्र महतो र शरतसिंह भण्डारीले पनि हालसम्म आन्दोलनकारीसँग भेटेका छैनन् । आज पार्टीका कार्यकारिणी सदस्य अनिलकुमार झा उनीहरुसँग भेट्ने कार्यक्रम रहेको थियाे । राताे पार्टी