जनमत पार्टीको बन्द हडतालपछि सिरहामा निषेधाज्ञा जारी

स्थानीय प्रशासनले जनमत पार्टीले केही दिन अघि देखि सिरहा जिल्लामा गरिरहेको आमहडताल र चक्काजामका कारण सर्व साधारणमा पर्न सक्ने सम्भावित जोखिमलाई मध्यनजर गर्दै मंगलबार र बुधबार जिल्लामा निषेधाज्ञा लगाएको छ ।
प्रमुख जिल्ला अधिकारी लालबाबु कवारीले दुईदिन विहान ५ बजे देखि बेलुका ७ बजे सम्मका लागि जिल्लाभर निषेधाज्ञा लगाएको जानकारी दिए ।
प्रजिअ कवारीले यस अवधिमा कुनै किसिमको भेला हुन, बाहिर हिडडुल गर्न तथा राजनीतिक सभा तथा गतिविधि गर्न नपाउने गरी स्थानीय प्रशासन ऐन २०२८ को दफा ६ (२) र (३) बमोजिम निषेधाज्ञा जारी गरेको छ ।
यस अवधिमा राष्ट्रिय लोकमार्ग र सिरहा चोहर्वा सडकखण्डमा भनेबयातायात सुचारु रहने जनाइएको छ ।
स्थानीय प्रशासनले आदेश उल्लघन गर्नेलाई सुरक्षामा खटिएका सुरक्षाकर्मीले नियन्त्रणमा लिई कानून बमोजिम कारवाही गर्ने समेत जनाएको छ ।
स्थानीय प्रशासनले पूर्वमा बलान खोला देखि पश्चिममा कमला नदीसम्मको राष्ट्रिय लोकमार्ग तथा लोकमार्गको उतर दक्षीण ५०० मिटर आसपासका क्षेत्रसम्म, चोहर्वा देखि सिरहा सडक खण्डको पि.के.राज इन्टरप्राईजेज (पेट्रोल पम्पसम्म) तथा सो मार्गको ५०० मिटर पूर्व पश्चिम आसपासका क्षेत्रसम्म निषेधाज्ञा जारी गरिएको छ ।
जनमत पार्टीले किसानलाई नियन्त्रणमा लिएको भन्दै उनीहरूलाई छाडन विभिन्न माग सहित जिल्लामा बन्द हडताल गरेका छन् । सो क्रममा गाडीहरुमा तोडफोड गर्नुका साथै आगजनी समेत गरेका छन् ।