धनुषाको कुम्हरामा पेस्तोल देखाउँदै लाखौंको डकैती

विनोद महतो
महेन्द्रनगर, साउन १९ ।
धनुषामा गएराति डकैती भएको छ । धनुषा जिल्लाको धनुषाधाम नगरपालिका वडा नं. ८ कुम्हरा टोल बस्ने ५५ वर्षीय विजय बनरैत यादवको घरमा डकैती भएको छ । १७/१८ जनाको संख्यामा मुख छोपेर आएको डाकाँहरुको समूहले यादवको कञ्चटमा पेस्तोल तेर्साएर लुटपाट गरेको छ ।
घरमा लुटपाटको क्रममा डाँका समूहले यादवको कान्छो छोरा १६ वर्षीय अनिल यादव, ज्वाई ३० वर्षीय मञ्जय यादव र छोरी २६ वर्षीया कामनी यादवलाई कुटपिट समेत गरेको छ । डाँकाले यादवको छोरी २६ वर्षीया कामनीलाई रड प्रहार गरेर टाउको फुटाइ दिएको छ भने ज्वाई मञ्जयलाई रडले कुटेको छ । उनीहरुको स्थानीय स्तरमा उपचार गरिएको ईलाका प्रहरी कार्यालय ढल्केवरले जनाएको छ ।
राति करिव १/२ बजेको समयमा हातहतियारसहित आएको डाकाँले यादवको घरबाट २ तोला सुन, ६० तोला चाँदीको कारा र ३ थान मोबाइल सेट लुटेकाे पीडित यादवले बताएका छन् ।
दर्जनौको संख्यामा हतियार सहित डाँकाहरु देखेपछि स्थानीयहरु प्रतिकार गर्न डराएका थिए । यता डकैती भएको घरमा विहान मात्रै पुगेको ईलाका प्रहरी कार्यालय ढल्केवरको टोलीले डाँका समूहको खोजी भईरहेको बताएको छ ।