बालिका बलात्कार आरोपितलाई ८ वर्ष जेल सजाय

शुभनारायण यादव
सप्तरी, मंसिर ३० गते ।
सप्तरीमा बालिका बलात्कार गरेको आरोपीलाई ८ वर्ष कैद सजाय दिइएको छ । आरोपित सप्तरीको शम्भुनाथ नगरपालिका–५ मोहनपुरका ४० वर्षीय गेनाइ राम चमारलाई अदालतले ८ वर्ष कैद सजाय सुनाएको हो ।
सप्तरी जिल्ला अदालतका न्यायाधीश नारायणप्रसाद दाहालको इजलासले थुनामा रहेका आरोपितलाई ८ वर्ष कैद सजाय तोकेको हो । उनी २०७४ चैत १८ गतेदेखि पुर्पक्षका लागि राजविराज कारागारमा रहेका थिए ।
बलात्कारका आरोपितलाई आठ वर्ष कैद सजायका साथै रु १० हजार जरिवानाको फैसलासमेत सुनाएको जिल्ला प्रहरी कार्यालय सप्तरीका डीएसपी तथा प्रहरी प्रवक्ता भुवनेश्वरप्रसाद साहले जानकारी दिए ।
डीएसपी साहका अनुसार शम्भुनाथ नगरपालिका–२ मा काठको फर्निचर पसल सञ्चालन गरी बसेका आरोपितले १३ वर्षिया बालिकालाई ललाइफकाई पटक–पटक बलात्कार गरी गर्भवती बनाएको भन्दै पीडितकी आमाले जिल्ला प्रहरी कार्यालय सप्तरीमा २०७४ फागुन २० गते उजुरी दिइएको थियो ।
आरोपितले बलात्कार गरेको कुरा पीडित बालिकाले ढिलो गरी बताएकाले प्रहरीमा कारवाहीका लागि उजुरी गर्न ढिलाइ भएको पीडितकी आमाले बताइन् । प्रहरीले आरोपितलाई २०७४ फागुन २२ गते पक्राउ गरेकामा अदालतको आदेशमा २०७४ चैत १८ गतेदेखि पुर्पक्षका लागि कारागारमा थुनामा राखिएको छ ।सभार टुडेपाटी