डा. केसीको मागलाई बेवास्ता गरेको भन्दै जलेश्वरमा धर्ना

प्रतिक्षा खबर
रामगाेपालपुर, असोज २० गते ।
अनशनरत डा.गोविन्द केसीको समर्थनमा महोत्तरीको जलेश्वरमा शान्तिपूर्ण धर्ना दिइएको छ । केसीका माग जायज हुँदाहुँदै सरकारले बेवास्ता गरेको भन्दै उनीहरुले बीच सडकमा बसेर धर्ना दिएका हुन् ।
जलेश्वरको बुद्धिजीवी चोकमा मंगलबार दिउँसो १ बजेदेखि साढे १ बजेसम्म चिकित्सा शिक्षा सुधारको माग गर्दै २३ दिनदेखि अनशनमा बसेका डा. केसीको पक्षमा नेपाली काँग्रेस, सूचना, सञ्चार तथा प्रचार विभागका केन्द्रीय सदस्य बजरंग नेपालीको नेतृत्वमा धर्ना दिइएको हो ।
डा.केसीको समर्थन एवं उनको जीवन रक्षा तथा जायज मागहरूप्रति ऐक्यबद्धता र संघिय सरकारको गैरजिम्मेवारीपनकाबिरूद्ध आफुहरुले शान्तिपूर्ण धर्ना दिएको नेविसंघ महोत्तरीका अध्यक्ष आशुतोष झा नविनले जानकारी दिए ।
नागरिक सरोकार बिरोधी सरकार मुर्दावाद, मेडिकल माफियाको दादागिरी बन्द गर, डा.गोवीन्द केसीको माग पुरा गरलगायतका नारा लेखिएको प्लेकार्ड सहित उनीहरूले धर्ना दिएका छन् ।
धर्नामा नेपाली कांग्रेस सूचना,सञ्चार तथा प्रचार विभागका केन्द्रिय सदस्य बजरंग नेपाली , नेपाली कांग्रेस महोत्तरीका नगर सभापति अशोक साह, नेता लबराजा सिंह, तरुण दलका जिल्ला अध्यक्ष बिनय यादव , क्षेत्रीय सभापति दिलिप पाण्डे , जलेश्वर उद्योग वाणिज्य संघका पुर्वअध्यक्ष राजु साह, नेविसंघका जिल्ला नेता आशुतोष झा, सुनिल सुमन, निवेश मण्डल, नेविसंघका नगर सभापति बादल साहलगायतका नेता कार्यकर्ताहरुको सहभागिता रहेको थियो ।
टुडेपाटी डटकम