१० कात्तिक, बुटवल । जनमत पार्टीका लुम्बिनी प्रदेश सांसद सीके गुप्तामाथि रुपन्देहीको लुम्बिनी सांस्कृतिक नगरपालिकामा हातपात प्रयास भएको छ ।
शनिबार विहान युवाहरुको एक समूहले लुम्बिनी साँस्कृतिक नगरपालिकास्थित इलाका प्रहरी कार्यालय अगाडि गुप्तामाथि हातपात प्रयास गरेको हो ।
आफूलाई प्रहरीले कार्यालयभित्र लगेको र दुई घण्टादेखि त्यहीँ बसिरहेको गुप्ताले बताए । इलाका प्रहरी कार्यालय लुम्बिनीका इन्चार्ज प्रहरी निरीक्षक दीपक मगरातीका अनुसार सांसद गुप्ता आफ्नो कार्यालयतर्फ जाँदै गर्दा बाटोमा एक समूहले हातपात प्रयास गरेको हो ।
इलाका प्रहरी कार्यालय अगाडि गुप्ता सवार बागमती प्रदेश ३–०१ च ६६२७ नम्बरको गाडी रोकेर युवाहरुले हातपातको प्रयास गरेपछि प्रहरीले रोकेर सांसद सवार गाडीलाई आफ्नो कार्यालयभित्र पुर्याएको उनले बताए ।
कांग्रेस नेता फखरुद्दिन खाँका भतिज एजाज खान नेतृत्वको समुहले आफूमाथि आक्रमण गरेको सांसद गुप्ताले बताए । आफूलाई रोकेर गाडीमा सँगै रहेका २ जनामध्ये एक जनालाई बाहिर निकालेर कुटपिट गरेको उनले बताए ।
इलाका प्रहरी कार्यालय लुम्बिनीका प्रमुख मगरातीका अनुसार भैसहियामा पूर्वसांसद फखरुद्दिनका भतिज नेतृत्वको समूह र सांसद सीके गुप्ता समर्थक समूहबीचको विवादछ ।
सामाजिक सञ्जालमा स्टाटस लेखेको विषयमा उत्पन्न विवादले उग्र रुप लिएपछि यो अवस्थासम्म आएको उनले बताए । थप बुझ्न र समस्या समाधानका लागि दुबै पक्षका व्यक्तिहरुलाई बोलाएर छलफल गर्ने तयारी भएको प्रहरीको भनाइ छ ।
