राजविराज । सूचनाको हकबाट वञ्चित गरी आफुमाथि हातपात गर्ने कर्मचारीलाई विभागिय कार्वाहीको माग गर्दै पत्रकार बैद्यनाथ यादवले प्रमुख जिल्ला अधिकारी समक्ष निवेदन दिएका छन् ।
नेपाल पत्रकार महासंघ सप्तरीका उपाध्यक्ष श्यामसुन्दर यादवको नेतृत्वमा पत्रकारहरुको संयुक्त टोलीले प्रमुख जिल्ला अधिकारी शंकरहरि आचार्यलाई निवेदन दिएका हुन् । एभिन्यूज टेलिभिजनका सप्तरी सम्वाददाता समेत रहेका पत्रकार यादवले आफु राजविराज स्थित कृषी ज्ञान केन्द्रमा सूचना संकलन गर्न जाँदा कार्यालय प्रमुख नभेटिएपछि योजना शाखा प्रमुख किसुनदेव राउत र बाली संरक्षण अधिकृत दिनेशचन्द्र यादवले आफुलाई स्टेन्डअप दिने क्रममा चारैतिरबाट घेरा हालीे हातपातको प्रयास गर्दै क्यामरा समेत खोस्ने प्रयास गरेको निवेदनमा उल्लेख छ ।
राष्ट्रसेवककर्मचारीले प्रचलित ऐन कानून बमोजिम दिनुपर्ने सूचना दिन इन्कार गरी कार्यालय परिसरभित्रै आफुलाई अपमानजनक तथा अभद्र व्यवहार गालीगलौज समेतका कार्य गरेको निवेदनमा जनाईएको छ । निवेदनमा अगाडि भनिएको छ ‘आफ्नो पदीय दायित्व तथा जिम्मेवारीबाट विमुख भई गालीगलौज, बेइज्जती र हातपात गर्दै क्यामरा समेत खोस्ने प्रयास गर्ने कर्मचारीहरुलाई प्रचलित ऐन कानून बमोजिम विभागिय सहित अन्य कार्वाही समेत गरी स्वतन्त्रतापूर्वक समाचार संकलन गर्ने वातावरण बनाई दिनुहुन अनुरोध छ ।’
प्रमुख जिल्ला अधिकारी आचार्यलाई निवेदन बुझाउनकालागि नेपाल पत्रकार महासंघका केन्द्रिय सदस्य अवधेश कुमार झा, महासंघका प्रदेश सचिव रामनारायण विश्वास, महासंघ सप्तरीका सहसचिव चन्दन यादव, फोटो पत्रकार महासंघ सप्तरीका अध्यक्ष मनोज कुमार माझी, उपाध्यक्ष नविन गुप्ता, सचिव विद्यानन्द राम, मनोहर कुमार पोखरेल, दिनानाथ यादव, सौरभ यादव लगायतको उपस्थिति थियो ।
