मधेस प्रदेश सरकारको नेतृत्व गरेको जनमत पार्टी स्थानीय तहको उपनिर्वाचनमा प्रतिस्पर्धामै आउन सकेको देखिएन ।
जनमत पार्टीको मधेस प्रदेश सभामा १३ सांसद र प्रतिनिधि सभामा ६ सांसद छन् । मधेस प्रदेशमा जनमत पार्टी चौथो पार्टीको रूपमा रहेर सरकारको नेतृत्व गरेको छ । जनमत पार्टी नेतृत्वको सरकारलाई कांग्रेस–एमाले गठबन्धनले समर्थन गरेको छ ।
हालै सम्पन्न उपनिर्वाचनमा धनुषाको धनुषाधाम नगरपालिका–१ मा माओवादी केन्द्रका सुनिल कापर केवट ६८४ मतका साथ निर्वाचित हुँदा जनमत पार्टीका उम्मेदवार कुशेश्वर मण्डल २५ मत ल्याएर सातौँ स्थानमा सीमित रहे ।
२०७९ को चुनावमा पनि यो वडामा जनमत पार्टी प्रतिस्पर्धामै आउन सकेको थिएन । अघिल्लो निर्वाचनमा धनुषाधाम नगरपालिका–१ मा १० औँ स्थानमा सीमित भएको जनमत पार्टीले अहिले केही मत बढाएको देखिन्छ ।
त्यस्तै, सप्तरीको डाक्नेश्वरी नगरपालिका–१ मा जसपा नेपालका धिरेन्द्र साह ६५२ मत ल्याएर निर्वाचित हुँदा जनमत पार्टीका शैलेन्द्र साह ७४ मतमा सीमित भए । गत चुनावमा जनमत पार्टी त्यहाँ पाँचौँ स्थानमा थियो । कांग्रेसका प्रितम लाल चौधरी ५३५ मत ल्याएर अघिल्लो निर्वाचनमा विजयी हुँदा जनमत पार्टीका दीपेन्द्र साहले ९६ मत प्राप्त गरेका थिए । विगतको चुनावभन्दा यो उपचुनावमा जनमत पार्टीले यहाँ केही मत घटाएको छ ।
डाक्नेश्वरीकै वडा नम्बर ४ मा जसपा नेपालका उम्मेदवार देवेन्द्रप्रसाद यादव ३७२ मतका साथ निर्वाचित हुँदा जनमतका उम्मेदवार उदयनारायण पण्डित २३१ मतका साथ तेस्रो स्थानमा सीमित भए । २०७९ को चुनावमा पनि यहाँ जनतमत पार्टी तेस्रो स्थानमै थियो । ३३३ मत ल्याएर कांग्रेसका हरिप्रसाद राय निर्वाचित हुँदा जनमतका उम्मेदवार पण्डितले १९७ मत पाएका थिए । यो उपचुनावमा जनमतले त्यहाँ केही मत बढाएको छ ।
रौतहटको ईशनाथ नगरपालिका–७ मा कांग्रेसका शेष अब्दुल खलिक ६२७ मतका साथ निर्वाचित हुँदा जनमतका उम्मेदवार शेख जमिरुल १३५ मतका साथ चौथो नम्बरमा सीमित भए ।
२०७९ को चुनावमा जनमत पार्टी यहाँ २० मत प्राप्त गरेर पाँचौँ स्थानमा पुगेको थियो । त्यतिबेला एमालेका शेख खली उल्लाहले ६८३ मतका साथ निर्वाचित भएका थिए ।
त्यस्तै राजपुर– ६ को अध्यक्षमा कांग्रेसका समसे आलम ७४४ मतका साथ निर्वाचित भए । जनमत पार्टीका क्यामुदिन धुनिया ४५ मत ल्याएर चौथो स्थानमा सीमित भए । गत चुनावमा जनमत पार्टीले सो वडामा एक मत पनि ल्याउन सकेको थिएन । त्यतिबेला जनमत पार्टीले शेख मोहम्मत उस्तादलाई उम्मेदवार बनाएको थियो । २०७९ को निर्वाचनको तुलनामा उपनिर्वाचनमा जनमत पार्टीले सो वडामा आफ्नो मत बढाएको हो ।
रौतहटको गढीमाई नगरपालिकाको वडा नम्बर ८ मा नेकपा एकीकृत समाजवादीका बजरंगीप्रसाद यादव ६५५ मतका साथ निर्वाचित हुँदा जनमतका उम्मेदवार सुरेन्द्र राउत कुर्मीले जम्मा ८ मत प्राप्त गर्दै छैटौँ स्थानमा सीमित भए । गत चुनावमा यहाँ जनमत पार्टी जम्मा ६ मत ल्याएर आठौँ स्थानमा थियो । यसपटक जनमत पार्टीले दुई मत थपेको छ ।
जनमत पार्टीबाट काठमाडौँको कीर्तिपुर नगरपालिकाको प्रमुखमा उम्मेदवारी दिएका केशव श्रेष्ठले २९ मत मात्र ल्याएर १५ औँ स्थानमा रहे । त्यस्तै सोही नगरपालिकाको वडा नम्बर १ को अध्यक्षमा जनमत पार्टीका विकास प्रधानले ७ मत ल्याएर नवौँ स्थान हासिल गरे । सोही पालिकाको वडा नम्बर ४ को अध्यक्षमा जनमत पार्टीका कृष्ण महर्जनले २ मत प्राप्त गरे । यसअघिको चुनावमा जनमतले त्यहाँ आफ्नो उम्मेदवार उठाएको थिएन ।
जनमत पार्टीले कपिलवस्तुको शुद्धोधन नगरपालिका वडा नम्बर १ मा ४२३ मत प्राप्त गरेको छ । यहाँ एमालेका ताहिर मुसलमानले ११५० मत ल्याएर निर्वाचित हुँदा जनमत पार्टीका सीताराम पटेल तेस्रो स्थानमा रहे ।
२०७९ को चुनावमा पनि जनमत पार्टी यहाँ तेस्रो स्थानमै थियो । त्यतिबेला जनमतका सीताराम पटेलले ५४७ मत ल्याएका थिए । विगतको चुनावको तुलनामा उपनिर्वाचनमा यहाँ जनमत पार्टीले आफ्नो मत घटाएको छ ।
त्यस्तै, जनमत पार्टीले कञ्चनपुरको भीमदत्त नगरपालिका वडा नम्बर ६ को वडा अध्यक्षमा यादव बहादुर चन्दलाई उम्मेदवार बनाएको थियो । चन्दले ५ मतमात्र प्राप्त गरे । गत चुनावमा जनमतले त्यहाँ उम्मेदवारी दिएको थिएन ।
उदयपुरको त्रियुगा नगरपालिका वडा नम्बर १२ को अध्यक्षमा प्रमोद मलाह सहनीलाई जनमत पार्टीले उम्मेदवार बनाएको थियो । उनले २० मत प्राप्त गरे । त्यहाँ ९२३ मत ल्याएर माओवादीका नविन कुमार वान्तवा निर्वाचित भए । गत चुनावमा जनमत पार्टीले त्यहाँ उम्मेदवारी दिएको थिएन ।
जनमत पार्टीका प्रवक्ता डा.शरदसिंह यादवले भर्खरै सम्पन्न स्थानीय तह उपनिर्वाचनको नतिजा अपेक्षा अनुसार नभएको बताए । तल्लो तहसम्म संगठन विस्तार र स्थानीय नेतृत्वको विकास गर्न नसक्नु नै कमजोर नतिजा आउनुको प्रमुख कारण रहेको उनको भनाइ छ ।
यादवले यो उपनिर्वाचनको नतिजालाई गम्भीर रूपमा समीक्षा गरी आफ्नो कमी–कमजोरीलाई सुधार्दै अघि बढ्न आवश्यक रहेको बताए । आगामी निर्वाचनको रणनीति निर्माणका लागि समेत यो उपनिर्वाचनको गहनतम समीक्षा महत्त्वपूर्ण हुने उनले प्रस्ट पारे ।
अपेक्षाकृत मत नआए पनि समग्रमा जनमत पार्टी र सो पार्टीका अध्यक्ष डा. सीके राउतको स्वीकार्यता बढेको यादवको दाबी छ । उनले जनमत पार्टीका अध्यक्ष राउतको चर्चा सबैतिर हुन थालेपछि नियोजित रूपमा विरोधीद्वारा जनमत पार्टीका नेता÷कार्यकर्ताको मनोबल गिराउने काम भइरहेको आरोप लगाए ।
यादवले भने, ‘स्थानीय निर्वाचन प्रणाली कति विकृत छ, यो हामी सबैलाई थाहा भएकै कुरा हो । यसमा पार्टीको नीति, सिद्धान्त, रोडम्याप साथै केन्द्रीय नेतृत्व समेतको सबै कुरा गौण हुन्छन् । स्थानीय निर्वाचनमा अर्थ, जातपात, धर्म, इष्टमित्र, करकुटुम्ब, डरधम्की आदिले प्राथमिकता पाउँछ ।’
जनतालाई जागृत गराएर यस्तो खाले विकृतिलाई हटाउनका लागि पनि जनमत पार्टीले अभियान चलाएको प्रवक्ता यादवको दाबी छ । उनले गलत कुरा प्रयोग गरेर जसरी पनि चुनाव जित्ने र जितेपछि गाउँ–समाजमा विकासको सट्टा भ्रष्टाचार, जनतालाई दमन–शोषण, उत्पीडन गर्नेमा आफ्नो पार्टी नलाग्ने प्रस्ट पारे ।
