प्रतीक्षा खबर
सर्लाही, वैशाख १० गते ।
सर्लाहीमा स्थानीय युवा समूहको कुटाईबाट प्रहरी सहायक निरीक्षक (असई) विकरु मण्डल घाइते भएका छन् ।
सर्लाहीको राजघाटस्थित प्रहरी चौकीमा मोबाईल चोरी भएको उजुरी आएपछि चौकी नजिकैको गाउँमा पुगेका मण्डलमाथि लकडाउन उल्लंघन गर्दै जम्मा भएका स्थानीयले कुटपिट गरेको जिल्ला प्रहरी कार्यालय मलंगवाले जनाएको छ ।
मंगलबार राती ९ बजे तिर एक प्रहरी जवानसँगै गाउँ पुगेका प्रहरी सहायक निरीक्षक मण्डलले धेरै भिडभाड नगर्न भनेर सम्झाउने क्रममा स्थानीय बासिन्दासँग भनाभन भएको र विवाद बढ्दै गएपछि मदिरा सेवन गरेर मातिएका स्थानीय बासिन्दाको समूहले कुटपिट गरेको जनाइएको छ ।
कुटपिटमा संलग्न भएको आरोपमा राती नै स्थानीय तीनजनालाई नियन्त्रणमा लिईएको जिल्ला प्रहरी कार्यालय सर्लाहीका प्रवक्ता प्रहरी नायव उपरीक्षक मदन कुँवरले बताए । टाउकोमा चोट लागेर घाईते भएका प्रसनि मण्डलको हरिवन स्थित नमुना अस्पतालमा उपचार भइरहेको छ ।
राती नै ईलाका प्रहरी कार्यालय हरिवनका प्रहरी निरीक्षक राजेन्द्र प्रसाद उपाध्याय नेतृत्वको टोली घटनास्थल पुगेर असई मण्डलको उद्दार एवं कुटपिटमा संलग्नलाई नियन्त्रणमा लिएको थियो ।
