नेकपा एमालेबाट मधेश प्रदेश सभाका चार जना प्रदेश सांसद प्रतिनिधि सभा निर्वाचनमा उम्मेदवार बन्ने भएका छन् । यीमध्ये दुई जना मधेश प्रदेशका पूर्वमुख्यमन्त्री तथा एक जना पूर्वसभामुख रहेका छन् ।
सप्तरी क्षेत्र नम्बर २ बाट जनमत पार्टीका प्रदेश सांसदसमेत रहेका पूर्वमुख्यमन्त्री सतिशकुमार सिंहलाई नेकपा एमालेले प्रतिनिधि सभा उम्मेदवार बनाउने निर्णय गरेको छ ।
त्यस्तै, धनुषा क्षेत्र नम्बर १ बाट मधेश प्रदेशका निवर्तमान सभामुख रामचन्द्र मण्डल र महोत्तरी क्षेत्र नम्बर ४ बाट निवर्तमान मुख्यमन्त्री तथा नेकपा एमाले संसदीय दलका नेता सरोज यादवलाई पनि पार्टीले उम्मेदवार बनाउने निर्णय गरेको छ ।
यसैगरी, पर्सा क्षेत्र नम्बर ३ बाट एमालेका प्रदेश सांसद प्रमोद जयसवाललाई प्रतिनिधि सभा उम्मेदवारका रूपमा अघि सारिएको छ ।
उम्मेदवारीका लागि सिफारिस भएका चारै जना प्रत्यक्ष निर्वाचित प्रदेश सांसद हुन् । प्रतिनिधि सभा निर्वाचनमा उम्मेदवारी दर्ता गर्ने तयारीसँगै उनीहरूले प्रदेश सांसद पदबाट राजीनामा दिने तयारी गरेका छन् ।
