काठमाडौँ। क्यालिफोर्निया राज्यको सिमी भ्यालीमा एक सानो विमान आवासीय क्षेत्रमा खस्दा दुई जनाको मृत्यु भएको छ।
अमेरिकी सञ्चारमाध्यम सीएनएनका अनुसार, दुर्घटनामा विमानमा सवार दुवै व्यक्ति र एक घरपालुवा कुकुरको ज्यान गएको हो। दुर्घटना स्थानीय समयअनुसार शनिबार दिउँसो २:१० बजे भएको थियो।विमान खसेलगत्तै दुई घरमा आगलागी भएको थियो भने घरमा रहेका मानिसहरूलाई सुरक्षित रूपमा उद्धार गरिएको भेन्चुरा काउन्टी फायर डिपार्टमेन्टले जनाएको छ।
सिमी भ्याली प्रहरीले विमानमा सवार सबैको मृत्यु भएको पुष्टि गरेको छ।फेडेरल एभिएसन एडमिनिस्ट्रेसन (FAA) का अनुसार, चार सिट भएको एकल इन्जिनको विमान ल्यांकेस्टरस्थित विलियम जे. फक्स एरफिल्डबाट उडेर कामारिलो विमानस्थलतर्फ जाँदै गरेको थियो। दुर्घटनाबारे विस्तृत अनुसन्धान जारी छ।
