प्रतीक्षा खबर
रामगाेपालपुर, साउन ४ गते
जनता समाजवादी पार्टी (जसपा) ले महोत्तरीको पिपरा गाउँपालिका विरुद्ध प्रदर्शन गरेको छ । गाउँपालिका अध्यक्ष विक्रम चौधरीले भ्रष्टाचार गरेको भन्दै गाउँपालिकामा विरोध गर्दै जसपाले कार्यालय घेराउ गरेपछि कार्यकर्ता र प्रहरीबीच झडप भएको हो ।
गाउँपालिका अध्यक्ष चौधरीलाई सातदिने अल्टिमेटम दिँदै एक महिनाअघि बुझाएको ज्ञापन पत्रबारे गाउँपालिकाले कुनै सुनवाइ नगरेको भन्दै जसपा कार्यकर्ताहरू प्रदर्शनमा गरेका हुन् । यता आफूहरूले बुझाएको ज्ञापन पत्रबारे गाउँपालिकाले सुनवाइ नगरेपछि बाध्य भएर आन्दोलनमा उतिरनुपरेको जसपाका पिपरा गाउँपालिका अध्यक्ष विनित पाण्डेले जानकरी दिए ।
विभिन्न माग राख्दै गाउँपालिकालाई आफूहरूले बुझाएको ज्ञापन पत्रबारे जानकारी लिनजाँदा प्रहरीले गाउँपालिका कार्यालयभित्र प्रवेश नदिएपछि झडप भएको पाण्डेले बताए । नेकपाबाट निर्वाचित गाउँपालिका अध्यक्ष चौधरीले डिपिआरदेखि राहत वितरणमा समेत व्यापक भ्रष्टाचार गरेको जसपको आरोप छ । जसपाले डीपीआर सम्पन्न भएको योजना र योजनामा समावेश भएको मिति, कार्य सम्पन्न मिति तथा प्रतिवेदनको प्रतिलिपी सार्वजनिक गर्न माग गरेको छ ।
यसैगरी जाडो महिनामा गरिब तथा विपन्नलाई वितरण गरिएको न्यानो लुगा खरिदमा समेत भ्रष्टाचार भएको उसको दाबी छ । जाडो महिनामा स्वेटर, कम्बललगायताका लुगा वितरण गर्ने निर्णयका साथै प्रत्येक विद्यालयमा रहेका विद्यार्थीहरूको विवरण र खर्च भर्पाइ सार्वजनिक गर्न जसपाले माग गरेको छ ।
पालिकामातहतका सम्पूर्ण पोखरीको ठेक्का प्रक्रियाका कागजात, ठेक्का रकमका साथै विगतका ठेकेदारहरूबाट असुल गरिएको रकमको विवरण सार्वजनिक गर्नुपर्ने जसपाले माग गरेका छन् । सभार टुडेपाटी
