जनकपुरधाम, चैत ११ गते ।
जनकपुरधाममा ‘लक डाउन’ को पालना नगर्नेलाई प्रहरीले अब पक्राउ र बल प्रयोग गर्ने भएका छन् । विश्वभर फैलिसकेको कोरोना भाइरसको संक्रमणबाट बच्न नेपाल सरकारले मंगलबार बिहानैदेखि देशैभर लकडाउन गरेको छ ।
सर्वसाधारणलाई अतिआवश्यक काम बाहेक घरबाट ननिस्कन एकसताको लागि प्रतिवन्ध लगाएको छ । तर जनकपुर बजारमा त्यसको पूर्णरुपमा पालना भएको छैन । सर्वसाधारणहरु अत्याबश्यक काम बाहेक पनि सडकमा हिडडुल गरिरहेका छन् । मोटरसाइकल र अटो रिक्सहरु बजारका सडकहरुमा गडेको देखिएको छ ।
लकडाउनको उलंघन गर्दै अत्याबश्यक काम बाहेक बाहिर हिडडुल गर्नेलाई पक्राउ र जथाभावी गर्नेलाई बल प्रयोग गर्न प्रहरीलाई निर्देशन दिएको छ । अहिले जनकपुरको विभिन्न ठाउँहरुमा सुरक्षाकर्मी परिचालन भएको छ । घरबाट बाहिर निस्कनेलाई अतिआबश्यक काम बाहेक घर फर्काउने, सम्झाउने गरिरहेका छन् । नमान्नेलाई पक्राउ गर्न तथा जथाभावी गर्नेलाई लठ्ठी समेत प्रयोग गर्न प्रशासनले निर्देशन दिएको छ ।
पास बाहेकका सवारीसाधन सडकमा गुडाउन प्रतिबन्ध लगाएको छ । जिल्ला प्रशासन कार्यालय धनुषाले केहि सरकारी गाडी, संचार तथा स्वास्थ्य क्षेत्रका कर्मचारीलाई पासको व्यवस्था गरेको छ ।
