गोपाल झा
महोत्तरी , अषाढ १५ गते
नेपाल पत्रकार महासंघ महोत्तरी शाखामा प्रेस युनियन र प्रेस मञ्चद्वारा संयुक्त रुपमा तालाबन्दी गरिएको छ । नेपाल पत्रकार महासंघ केन्द्रीय समिति तथा निर्वाचन समितिले लोकतन्त्रको मूल्य मान्यतालाई अवमूल्यन गर्दै निर्वाचनको गतिविधि अगाडि बढाएको विरोध गर्दै महोत्तरी शाखामा प्रेस युनियन र प्रेस मञ्चले शनिबार संयुक्त रुपमा तालाबन्दी गरेको हो ।
प्रेस मञ्च महोत्तरीका अध्यक्ष नागेन्द्र यादव र नेपाल प्रेस युनियन महोत्तरी शाखाका अध्यक्ष सन्तोष कुमार सिंहले संयुक्त वक्तव्य जारी गर्दै जिल्ला शाखामा तालाबन्दी गरेको हो ।
पत्रकार महासंघ पत्रकारिता गर्ने पत्रकारको मात्रै साझा संस्था हुनुपर्ने संगठनको माग विपरित पत्रकारिताबाहेक अन्य पेशा, व्यवसायमा संलग्न व्यक्तिका नाम रातारात थपिएको भन्दै पत्रकारिता पेशामै रहेका थुप्रै मधेसी, महिला, दलित, जनजातीसहितका नाम हटाइएको प्रेस मञ्च महोत्तरीका अध्यक्ष यादवको आरोप छ ।
त्यस्तो सदस्यता विवरण खारेज गरी न्यायोचित सदस्यता जारी नभएसम्म मञ्च तथा युनियनले लगाएको तालाबन्दी र विरोध जारी रहने मञ्चका अध्यक्ष यादबले बताए ।
त्स्तै विधि, प्रकृया विपरित सार्वजनिक गरिएको नामावली खारेज गर्नु पर्ने, जिल्ला र प्रदेशबाट सिफारिस भएको बाहेक र जथाभावी रुपमा स्थानान्तरण गरिएका सदस्यता खारेज गर्नु पर्ने, नविकरण छुटेका साथीहरुको सदस्यता कायम गर्नु पर्ने माग गर्दै तालाबन्दी गरिएको नेपाल प्रेस युनियन महोत्तरीका अध्यक्ष सन्तोष सिंहले बताए ।
विधान र प्रकृया पुर्याएर मात्र निर्वाचन घोषणार र नेपाल पत्रकार महासंघले शुद्धिकरणको नाममा खास गरेर मधेशी पत्रकारहरुलाई सदस्यताबाट वञ्चित गर्ने षडयन्त्र बन्द नगरे सम्म तालाबन्दी जारी रहने वहाँहरुले बताए ।
