जहाँ उपेन्द्र हुन्छन्, त्यहाँ जाँदैनन् सीके राउत संग्रह

काठमाडौँ । जनता समाजवादी पार्टी (जसपा)नेपालका अध्यक्ष उपेन्द्र यादव सत्ता गठबन्धन छाडेर विपक्षी गठबन्धनमा गएपछि जनमत पार्टीका अध्यक्ष सीके राउत विपक्षी गठबन्धनबाट अलग भएका छन् ।
माओवादी केन्द्रले कांग्रेसको गठबन्धन छाडेर एमालेसँग गठबन्धन बनाएपछि जनमत पार्टीका अध्यक्ष राउत कांग्रेससँगै विपक्षी गठबन्धनमा बसे । गठबन्धन धेरै हेरफेर गर्न नहुने भन्दै उनले विपक्षी मोर्चा नै रोजेका थिए ।
तर अहिले जसपा नेपालका अध्यक्ष यादव सत्ता गठबन्धन र सरकारबाट अलग भएपछि विपक्षी मोर्चामा गएका छन् । जसपा नेपाल विपक्षी मोर्चामा आएसँगै जनमत पार्टीका अध्यक्ष राउत भने त्यहाँबाट बाहिरिएर सत्ता गठबन्धनमा जाने तरखरमा छन् ।
सत्ता गठबन्धनले मधेस प्रदेश सरकारको नेतृत्व जनमत पार्टीलाई दिने भनेका कारण नै सीके सत्ता गठबन्धनमा जान लागेको स्रोतले जनाएको छ । माओवादी केन्द्र र एमालेले पनि मधेस प्रदेशमा जनमत पार्टीलाई नेतृत्व दिने लगभग निश्चित गरिसकेका छन् । जनमत पार्टीको नेतृत्वमा सरकार गठन गर्ने भनेर प्रक्रिया पनि सुरु गरिसकेको छ ।
प्रधानमन्त्री प्रचण्डले सोमबार लिने विश्वासको मतमा जनमत पार्टीले समर्थन जनाउने स्रोतले दाबी गरेको छ । जनमत पार्टीका उपाध्यक्ष ई.दीपक साहले मधेस प्रदेश प्रदेशमा आफ्नो पार्टीलाई नेतृत्व दिएमा प्रधानमन्त्री प्रचण्डलाई विश्वासको मत दिने बताए ।
प्रदेशस्तरमा जनमतको नेतृत्वमा सरकार बनाउने सहमति भइसकेको भन्दै उनले त्यसमा केन्द्रमा सहमति हुन बाँकी रहेको बताए । यसबारे केन्द्रमा चाँडै टुङ्गो लाग्ने उनको भनाइ छ ।
जसपा नेपालले आफूहरूलाई थुप्रै पटक धोका दिएका कारण त्यो दलसँग सहकार्यको सम्भावना नरहेको उपाध्यक्ष साह बताउँछन् । उनले भने, ‘भोलिका दिनमा सुध्रिएर आए भविष्यमा के हुन्छ, त्यो भन्न सकिँदैन तर हाल जसपा नेपालसँग कुनै सहकार्य हुँदैन ।
कांग्रेस नेतृत्वको गठबन्धन छाडेको हो त भन्ने जिज्ञासामा उनले छाडेको पनि होइन र गएको पनि छैन भन्ने अस्पस्ट जवाफ दिए । उनले आफूहरू जेठ १५ गतेको तयारीमा रहेका कारण बैठकमा जान नपाएको जिकिर गरे ।
संसद अवरोधको विषयलाई लिएर केही दिनदेखि विपक्षी गठबन्धनको बैठक लगातार बसिरहेको छ । त्यो बैठकमा जसपा नेपालका अध्यक्ष उपेन्द्र यादव जान थालेका छन् । बैठकमा लोसपा, राप्रपाका नेताहरू पनि हुने गरेका छन् ।
जसपा नेपाल र जनमत पार्टीबिच मधेस प्रदेशमा द्वन्द्व छ । सप्तरी–२ बाट उपेन्द्र यादवलाई जनमत पार्टीका अध्यक्ष सीके राउतले हराएपछि दुई दलको बिच द्वन्द्व सुरु भएको हो । जसपा नेपालका अध्यक्ष उपेन्द्र यादव बारा–२ मा उपनिर्वाचनमा भाग लिँदा त्यहाँ पनि सीके राउत आक्रामक रुपमा प्रस्तुत भएका थिए
सप्तरीमा मधेस कृषि विश्वविद्यालयको भवन शिलान्याशको विषयलाई दिएर दुई पार्टीबिच झडप नै भएको थियो । झडपका कारण जनमत पार्टी मधेस सरकारबाट बाहिरिएको हो ।