काठमाडौँ । तराई मधेस केन्द्रित दलहरूले गठन गरेको संघीय लोकतान्त्रिक मोर्चालाई विघटन गरेर पार्टी एकता गर्ने दिशामा छलफल अघि बढाएका छन् ।
बबरमहलस्थित तत्कालीन लोकतान्त्रिक समाजवादी पार्टी नेपालको कार्यालयमा बसेको लोकतान्त्रिक मोर्चाको बैठकमा त्यस्तो छलफल भएको हो । बदलिँदो परस्थितिमा मोर्चाका माध्यमबाट परिवर्तन सम्भव नदेखिएकाले मोर्चामा रहेका र मोर्चा बाहिर रहेका दलहरूको बिचमा एकता हुनुपर्ने विषयमा छलफल सुरु भएको जनता समाजवादी पार्टी नेपालका केन्द्रीय समन्वय समितिका नेता रामकुमार शर्माले बताए ।
अन्य पार्टीका अध्यक्षहरू व्यस्तताका कारण बैठकमा उपस्थित नभएको कारण कुनै निष्कर्षमा नपुगेको बताउँदै उनले अध्यक्षहरू सम्मलित बैठकबाट पार्टी एकताका लागि गृहकार्य सुरु हुने जानकारी दिए
जसपा नेपालका संरक्षक महन्थ ठाकुरको अध्यक्षतामा बसेको बैठकमा अन्य दलका अध्यक्षहरू सहभागी थिएनन् । तराई मधेसमा रहेका सम्पूर्ण दलहरूको बिचमा एकताका लागि संरक्षक ठाकुर सकारात्मक रहेको र उनले आफ्नो दलका अध्यक्षसँग कुरा गरेर एकता प्रक्रियालाई अगाडि बढाउने जनाएको बताइएको छ ।
संघीय लोकतान्त्रिक मोर्चामा उपेन्द्र यादव नेतृत्वको जसपा नेपाल, डा. सीके राउत नेतृत्वको जनमत पार्टी, राजेन्द्र महतो नेतृत्वको राष्ट्रिय मुक्ति पार्टी, रेशम चौधरी संरक्षक रहेको नागरिक उन्मुक्ति पार्टी नेपाल छन् । मोर्चा बाहिर रहेका दललाई समेत मिलाएर एकीकृत पार्टी बनाउने गृहकार्य सुरु भएको हो ।
महन्थ ठाकुरबाहेक अन्य पार्टीका अध्यक्ष उपत्यका बाहिर रहेका कारण बैठकमा अनुपस्थित रहेको जनाइएको छ । ठाकुरले चाँडै सबै दलका अध्यक्षलाई बोलाएर बैठक बोलाउने बताइएको छ ।
जसपा नेपालका नेता शर्माले अब पुरानै तरिका र पुरानै नेतृत्वले पार्टी वा देश चल्न नसक्ने बताए । उनले अब पार्टी अध्यक्षहरू एवं वरिष्ठ नेताहरूलाई पार्टीमा उच्च सम्मानसहितको स्थान दिएर नेतृत्वमा युवालाई ल्याउनुपर्ने सुझाव दिए ।
मधेसी थारु/जनजाति/खस आर्य समेत रहेको बृहत् पार्टी एकतामा जोड दिँदै उनले युवा पुस्ताको नेतृत्वमा हिमाल, पहाड, तराई मधेस समेतको सहभागितामा राष्ट्रिय पार्टी बन्नुपर्ने बताए । उनले पुरानो विचार एवं राजनीतिमा समय अनुकूल संशोधन र परिमार्जन आवश्यक रहेकोमा जोड दिँदै छिमेकीसँग विशेष एवं विश्वनीय मैत्रीपुर्ण सम्बन्धका लागि सुझाव दिएका छन् ।
