सिके राउत नेतृत्वको जनमत पार्टीका केन्द्रीय सचिव विशेश्वरप्रसाद साह (बीपी साह)माथि जबरजस्ती करणीको मुद्दा दर्ता भएको छ। धनुषाको जिल्ला प्रहरी कार्यालयमा २०८१ चैत्र ३१ गते एक २८ वर्षीया महिलाले साहमाथि आफूलाई घरमा एक्लो अवस्थामा जबरजस्ती करणी गरेको आरोप लगाउँदै जाहेरी दिएकी छन्।
प्रहरीले उक्त जाहेरीको आधारमा साहमाथि मुद्दा दर्ता गरेपछि उनी फरार रहेका छन्। साह विगत एक हप्तादेखि सामाजिक सञ्जालमा सक्रिय देखिएका छन् र जेन-जी प्रदर्शनमा सहभागि भएको तस्बिरहरू समेत सार्वजनिक गरेका छन्।
साह साविक रघुनाथपुर गाविस (हाल सबैला नगरपालिका वडा नम्बर १२) का बासिन्दा हुन्। जिल्ला प्रहरी कार्यालय धनुषाले फरार रहेका साहको तीन पुस्ते विवरण बुझाउन २०८२ भदौ ५ गते वडा कार्यालयलाई पत्र पठाएको छ। उक्त पत्रमा दुई दिनभित्र विवरण उपलब्ध गराउन भनिएको छ।
वडाध्यक्ष रामनारायण अधिकारीले आफू बिरामी भएको र कार्यालय नगएको कारण पत्रबारे थाहा नभएको बताउनुभएको छ भने वडासचिव नन्द ठाकुरले प्रहरीको पत्र प्राप्त भएको स्वीकार गरे पनि जवाफ प्रहरीलाई पठाइएको वा नपठाइएको विषयमा आफूलाई जानकारी नभएको जानकारी दिनुभयो।
यस घटनाले पार्टी र स्थानीय तहमा चिन्ता बढाएको छ भने प्रहरीले खोजतलास जारी राखेको छ।
