महोत्तरी २८ साउन ।
जनता समाजवादी पार्टी -जसपा_ नेपालका राष्ट्रीय अध्यक्ष उपेन्द्र यादवले देशमा बढदो भ्रष्टाचार, कुशासन र जातीय विभेदका कारण जनता आक्रोशित भएको भन्दै जुनसुकै बेला जनविद्रोह हुन सक्ने चेतावनी दिएका छन् ।
जसपा सप्तरीको नवनिर्वाचित जिल्ला कार्यसमितिको शपथग्रहण तथा पदभार ग्रहण कार्यक्रममा बुधबार सम्बोधन गर्दै अध्यक्ष यादवले वर्तमान सरकारप्रति जनता निराश हुँदै गएको उल्लेख गरे । उनले भने, “सरकारले एकल जातीय वर्चस्व कायम गर्दै तानाशाही प्रवृत्ति देखाइरहेको छ।“
यादवले सरकारको भ्रष्ट र नस्लीय प्रवृत्तिको आलोचना गर्दै देश उल्टो दिशातर्फ अघि बढिरहेको बताए । उनले मधेशमाथी योजनाबद्ध रूपमा विभाजन गरिएको आरोप लगाउँदै भने, “स्वायत्त मधेशको कुरा संविधानमै लेखिएको छ, तर प्रतिनिधित्व र बजेटमा अन्यायपूर्ण विभाजन भइरहेको छ ।” 
कार्यक्रममा मधेश प्रदेश सभा सदस्य अनिरूद्ध प्रसाद यादवले राजगढ गाउँपालिकामा लालु यादवको मृत्युप्रती दुःख व्यक्त गर्दै दोषी प्रहरीलाई कारबाहीको माग गरे ।
अन्य वक्ताहरूले पनि संगठन सुदृढीकरण, अधिकारका लागि संघर्ष र जनजागरणको आवश्यकता औंल्याएका थिए । कार्यक्रममार्फत अवकाशप्राप्त इन्जिनियर योगेन्द्र प्रसाद यादवले जसपा नेपालमा औपचारिक रूपमा प्रवेश गरेका छन् ।नवनिर्वाचित जिल्ला अध्यक्ष केदार यादवले पार्टी सशक्त बनाउन प्रतिबद्धता जनाए ।
