१२ असार, जनकपुरधाम । आफ्नै नेतृत्वको मधेश सरकारले ल्याएको बजेट नीति तथा कार्यक्रम अनुसार नआएकोले सन्तोषजनक नरहेको जनमतले निष्कर्ष निकालेको छ ।
आज बसेको जनमत संसदीय दलको बैठकले सरकारले ल्याएको बजेट त्रुटिपूर्ण रहेकोले सरकारबारे आधिकारिक निर्णय गर्ने जिम्मा पार्टीको केन्द्रीय सचिवालयलाई दिने निर्णय गरेको हो ।
‘जसरी नीति तथा कार्यक्रम आएको थियो । त्यस अनुसार बजेट आएन । यस बारेमा कुनै गम्भीर निर्णय पार्टीले लिनुपर्छ भन्ने निष्कर्ष हामीले निकालका छौं । यो जिम्मा सचिवालयलाई दिएका छौं,’ जनमत संसदीय दलका नेता महेश प्रसाद यादवले भने ।
मधेश सरकारले ल्याएको आगामी आर्थिक वर्ष २०८२/०८३ को बजेटको रेडबुकमा रहेको योजनाहरू बिचौलियाको प्रवेश रहेको, दलले नै संकलन गरेर राखेका योजनाहरु नपरेको भन्दै जनमतका केन्द्रीय अध्यक्ष डाक्टर सिके राउतले नै समाजिक सन्जाल मार्फत असन्तोष पोखेका छन् ।
जनमतका सतिशकुमार सिंह नेतृत्वको मधेश सरकारले गत असार १ गते आगामी आर्थिक वर्षका लागि ४६ करोड ९८ लाखको बजेट ल्याएको थियो ।
