गोपाल झा
महोत्तरी अषाढ ११ गते
महोत्तरीको औरही नगरपालिकाले आर्थिक वर्ष २०८२/८३ का लागि नीति तथा कार्यक्रम सार्वजनिक गर्दै स्वास्थ्य क्षेत्रमा उल्लेखनीय प्रगति भएको संकेत गर्दै पूर्ण खोप दिगोपना तथा सुनिश्चितता घोषणा समेत गरेको छ । नगरपालिकाले ८२/८३ का लागि प्रस्तुत गरेको निति तथा कार्यक्रम सार्वजनिक कार्यक्रमको समारोहका बीच आयोजित कार्यक्रममा प्रमुख अतिथि मधेश प्रदेशका मुख्यमन्त्री सतीश कुमार सिंह लगायत स्थानिय जनप्रतिनिधि र कर्मचारीहरुले पूर्ण खोप दिगोपना कार्यक्रम लाई निरन्तरता दिन र पूर्ण खोप लाई कायम राख्न प्रतिबद्धता बैनरमा हस्ताक्षर गरेका छन् ।
कार्यक्रममा बोल्दै मधेश प्रदेशका मुख्यमन्त्री सिंहले स्थानीय सरकारको नेतृत्वमा नागरिकको स्वास्थ्य सुरक्षामा भएको यस्ता उपलब्धि सराहनीय भएको बताए । उनले भने, “पूर्ण खोपको दिगोपना मात्र होइन, त्यसको निरन्तरता र सुनिश्चितता स्थानीय सरकारको प्रतिबद्धता र क्रियाशीलताले मात्र सम्भव हुन्छ ।” 
कार्यक्रममा औरही नगरपालीकाका नगर प्रमुख प्रदिप खड्काले प्रस्तुत गरेको नीति तथा कार्यक्रममा शिक्षा, स्वास्थ्य, पूर्वाधार, कृषिको व्यावसायिकरण, दिगो विकास र आय–आर्जनका अवसरहरूलाई प्राथमिकता साथ राखिएको जानकारी दिए ।
त्यस्तै औरही नगरपालिकाको स्वास्थ्य अवस्था विगत केही वर्षमा क्रमशः सुदृढ हुँदै गएको औरही नगरपालिका का स्वास्थ्य शाखा प्रमुख चन्द्रभुषण ठाकुरले जानकारी दिए । उनले स्थानीय तहले वडा स्तरमै स्वास्थ्य चौकीहरू सुदृढीकरण, सुरक्षित मातृत्व सेवा, पोषण कार्यक्रम, र निःशुल्क औषधि वितरण जस्ता कार्यक्रममार्फत स्वास्थ्य सेवा विस्तार गर्दै आएको बताए । 
विगत वर्षहरूमा नगर क्षेत्रका सबै टोल, बस्ती र वडामा टीकाकरण अभियानलाई प्राथमिकतामा राखी शतप्रतिशत बालबालिकामा नियमित खोप कार्यक्रम सफलतापूर्वक सम्पन्न गरिएकोले आज यो नगरपालिका पूर्ण खोप घोषणा गर्न पाएको बताए ।
