जिल्ला हुलाक कार्यालय महोत्तरीद्वारा ‘नागरिकसँग हुलाक सेवा- अन्तरक्रिया तथा प्रचार–प्रसार कार्यक्रम सम्पन्न

गोपाल झा
महोत्तरी, जेठ २९
जिल्ला हुलाक कार्यालय महोत्तरी, जलेश्वरको आयोजनामा – नागरिकसँग हुलाक सेवा – विषयक अन्तरक्रिया तथा प्रचार–प्रसार कार्यक्रम आज एक विशेष समारोहका साथ सम्पन्न गरिएको छ । कार्यक्रममा बिभिन्न राजनितीक दलका प्रतितिधी , पत्रकार, स्थानीय नागरिक, नागरिक समाजका प्रतिनिधि तथा हुलाक सेवासँग सम्बन्धित कर्मचारीहरूको सहभागिता रहेको थियो ।
       कार्यक्रमको अध्यक्षता जिल्ला हुलाक कार्यालयका प्रमुख रामचन्द्र शाहले गर्नुभएको थियो भने प्रमुख अतिथि रहेको एकडारा गाउँपालिकाका अध्यक्ष दिपनारायण मण्डलले हुलाक सेवा सबै नागरिकको आवश्यकता भएकाले यसलाई निरन्तरता दिँदै अझ प्रभावकारी र नागरिकमैत्री बनाउनुपर्ने धारणा व्यक्त गर्नुभयो । उहाँले गाउँ–गाउँमा अझ सहज र पहुँचयुक्त हुलाक सेवा पुर्‍याउनेतर्फ स्थानीय तह समेत गम्भीर हुनु आवश्यक रहेकोमा जोड दिनुभयो ।
        कार्यक्रममा सहभागी विभिन्न हुलाक कार्यालयका कर्मचारी, पत्रवितरक, पत्रकार तथा अन्य प्रतिनिधिहरूले परम्परागत हुलाक सेवा प्रणालीलाई कसरी आधुनिक प्रविधिसँग समायोजन गर्न सकिन्छ भन्ने विषयमा गहन छलफल गरेका थिए । साथै हुलाक वस्तुहरू नागरिकसम्म समयमै, सुरक्षित र प्रभावकारी ढंगले कसरी पुर्‍याउने भन्ने विषयमा पनि सुझाव तथा सिफारिसहरू प्रस्तुत गरियो ।
अन्तरक्रियामा “घर–घरमा हुलाक सेवा“ को अवधारणालाई व्यवहारमा उतार्न रणनीति र योजनाका विषयमा समेत छलफल भयो । सहभागीहरूले नागरिकको विश्वास अभिवृद्धि गर्ने उपायहरू, सेवामा पारदर्शिता र जवाफदेहिता बढाउने विषयमा पनि विचार आदानप्रदान गरे ।
कार्यक्रम अन्तर्गत नगर परिक्रमा गर्दै प्रचार–प्रसार अभियान सञ्चालन गरिएको थियो जसको माध्यमबाट नागरिकहरूसँग प्रत्यक्ष सम्पर्क स्थापित गर्दै हुलाक सेवाको महत्त्व र पहुँचबारे जानकारी दिइयो ।
       कार्यक्रममा वरिष्ठ पत्रकार तथा लेखक राकेश प्रसाद चौधरीले जलेश्वरमा स्थापित झण्डै १४७ वर्ष पुरानो हुलाक कार्यालयको ऐतिहासिक पृष्ठभूमिबारे जानकारी गराउँदै, हुलाक सेवाले समयको सन्दर्भमा कस्तो भूमिका निर्वाह गर्दै आएको छ भन्ने विषयमा प्रकाश पार्नुभयो ।
त्यस्तै, नेपाल पत्रकार महासंघ महोत्तरी शाखाका उपाध्यक्ष अरविन्द झा , बरीष्ट पत्रकार दशरथ भण्डारी, नेपाली काँग्रेसका अशोक साहलगायत अन्य वक्ताहरूले हुलाक सेवाको स्तरोन्नति, डिजिटल प्रविधिको प्रयोग, ग्रामीण क्षेत्रमा सेवा विस्तार र सेवा बहालकर्ताको क्षमता अभिवृद्धि जस्ता विषयमा महत्वपूर्ण सुझावहरू दिएका थिए ।
कार्यक्रमले समग्रमा हुलाक सेवालाई जनतासम्म प्रभावकारी रूपमा पु–याउन आवश्यक नीति, संरचना र समन्वयबारे स्पष्ट दृष्टिकोण बनाउने अवसर प्रदान गरेको सहभागीहरूको धारणा थियो । उनीहरूले यस्तो किसिमको कार्यक्रम समय–समयमा आयोजना हुनुपर्नेमा जोड दिएका छन् ।