गोपाल झा, ।महोत्तरी | बैशाख १५, सोमबार
महोत्तरी जिल्लाको एकडारा गाउँपालिका- १ स्थित एकडारामा आइतवार राति करिब ८ बजेको समयमा भएको भीषण आगलगीमा दुईवटा चौपायाको जलेर मृत्यु भएको छ भने एक चौपाया गम्भीर घाइते भएको छ।
स्थानीय सियासरण मुखियाको गोठघरमा मच्छर भगाउन बालिएको घुरबाट सल्किएको आगोले केही क्षणमै विकराल रूप लिँदै ठूलो क्षति पु¥याएको हो। घटनास्थलका प्रत्यक्षदर्शीहरूका अनुसार, गोठघरमा आगो सल्किएपछि तुरुन्तै नियन्त्रण का प्रयास गरिए पनि सकसपूर्ण अवस्थाका कारण आगो फैलँदै गएको थियो।
आगलगीमा मुखियाको गोठमा रहेका दुई चौपाया जलेर ज्यान गुमाएका छन् भने एक चौपाया गम्भीर घाइते भएको छ। साथै गोठघरमा रहेको लत्ता कपडा, अन्नपात, र नगद ५ हजार रुपैयाँ समेत पूर्ण रूपमा जलेर नष्ट भएको छ।
आगलगी यतिमा मात्रै सीमित रहेन। गोठ नजिकै रहेको सियासरणका छोरा लक्ष्मण मुखियाको घरसमेत आगोको चपेटामा पर्यो। लक्ष्मणको घरमा रहेको नगद ४० हजार रुपैयाँ, सुनको मंगलसूत्र, चाँदीको पायल, लत्ता कपडा र अन्नपात समेत पूर्ण रूपमा जलेर नष्ट भएको परिवारजनले बताएका छन्।
स्थानीय बासिन्दाको सहकार्यमा लामो प्रयासपछि आगो नियन्त्रणमा आएको हो। आगलगीबाट भएका क्षतिको प्रारम्भिक अनुमान लाखौँ रुपैयाँ बराबरको रहेको छ।
घटना पश्चात त्यहाँ पुगेका सुरक्षाकर्मीहरु तथा स्थानीय तह र प्रहरी प्रशासनले पीडित परिवारको राहत र क्षतिपूर्ति व्यवस्थापनका लागि आवश्यक प्रक्रिया अघि बढाएको वडा न १ का वडाध्यक्ष मनोज कुमार मण्डलले जानकारी दिएको छ।
आगलगी नियन्त्रण तथा उद्धार कार्यमा सक्रिय स्थानीय बासिन्दा हरु तत्पर देखिएका थिए ।
अधिकारीहरूले आगलगीको थप अनुसन्धान भइरहेको र सावधानीका उपायहरू अपनाउन सबैलाई सचेत गराइएको बताएका छन्।
