जनकपुरधाम । मधेश प्रदेश सरकारका मुख्यमन्त्री सतिश कुमार सिंहले मंगलबार मध्यरातमा मधेश कृषि विश्वविद्यालयका उपकुलपति डा. महादेव महतो र रजिष्ट्रार डा. भगवान ठाकुरलाई बर्खास्त गरेका छन् ।
दिउँसो एक बजेका लागि बोलाइएको विश्विद्यालय सभा (सिनेट) को बैठक अबेर सुरु गरी राति करिब १२ बजे दुई मात्र पदाधिकारीलाई बाहिर निकालेर उनीहरुलाई बर्खास्त गर्ने निर्णय गरिएको हो ।
मुख्यमन्त्री सिंहले पार्टी अध्यक्ष डा. सिके राउतको दबावलाई थाम्न नसकेपछि कानुनले नमिलेपनि डा. महतो र डा. ठाकुरलाई बर्खास्त गर्न बाध्य भएको बैठकमा सहभागी एक प्रतिनिधिले जानकारी दिए ।
‘पहिले त यो सिनेट बैठकमा मुख्यमन्त्री बस्ने क्षेत्राधिकारभित्र नै पर्दैन’ ती प्रतिनिधिले भने, ‘विश्वविद्यालय सञ्चालन र व्यवस्थापनका लागि अलगै कानुन र नियम छन् । त्यसको वावजुद क्षेत्राधिकार नाघेर सिनेटको बैठकमा सहभागी हुनुभएका मुख्यमन्त्री ज्यूले कानुन विपरित अर्को निर्णय लिनुभयो ।’
ती प्रतिनिधिले थप प्रष्ट्याउँदै भने, ‘मैले मुख्यमन्त्रीजीलाई कानुन नमिच्न सुझाव दिएपनि उहाँले रातभरमा पदाधिकारीलाई बर्खास्त नगरे भोली आफुले मुख्यमन्त्री पदबाट राजीनामा दिनुपर्ने दबाव रहेको भन्नुभयो ।’
मधेश कृषि विश्वविद्यालय जनमत नेतृत्व लिएदेखि नै सरकारलाई पचिरहेको थिएन । चालु आर्थिक वर्षका लागि बजेट बनाउने बेलामा जिम्मेवारीमा आएका सिंहले विश्वविद्यालय जस्तो विशाल कार्यक्षेत्र भएको निकायलाई जम्मा १० लाख रुपैयाँ नाममात्रको बजेट दिने निर्णय लिएका थिए । जबकी निर्माणाधिन अवस्थामा रहेको उक्त विश्वविद्यालयलाई अघिल्लो आर्थिक वर्षमा १३ करोड रुपैयाँ दिइएको थियो ।
सिनेट अध्यक्ष प्रदेश सरकारकी शिक्षा मन्त्री रानी तिवारी हुन् । उनको अध्यक्षतामा बस्नुपर्ने बैठकमा मुख्यमन्त्री सिंह उपस्थित मात्र भएनन् । शिक्षा मन्त्रीको भन्दा फरक पार्टीबाट प्रतिनिधित्व गर्ने मुख्यमन्त्री सिंहले राजनीतिक प्रतिशोध साधेको गुनासो उपकुलपति डा. महतोको छ ।
‘हामीले दुनियाँ नभएको काम मधेश कृषि विश्वविद्यालयका लागि अत्यन्तै छोटो समयमा गरिदिएका छौं । अझै धेरै गर्न आतुर रहेको बेला जनमत र जसपाबीचको लडाइमा हामी सिकार हुन पुगेका छौं’ डा. महतोले भन्ने, ‘यसले बौद्धिक वर्गलाई अपमान मात्र गरेको छैन, अन्याय हो र यसको प्रतिफल निकै अप्रिय हुनसक्छ ।’
