चार महिने सो अभियान मंसिर मसान्तसम्म चल्नेछ । मंसिर मसान्तसम्म सबै पालिकामा सो अभियान सम्पन्न भएन भने म्याद थप्न सकिने सो पार्टीका महासचिव लालबाबु राउतले बताए । उनले भने, ‘अभियानले पार्टीलाई फाइदा नै भइरहेको छ, म्याद थप्दा केही बिग्रिँदैन अहिले २० दिन अझै बाँकी छ सो अवधिमा सबै पालिकामा वडा तहसम्म कार्यक्रम भएन भने म्याद थप्ने सोच रहेको छ ।’
अहिले उपचुनावको माहौल भएकाले नेता तथा कार्यकर्ताहरू त्यसैमा लागेका छन् । बाँकी ठाउँहरूमा अभियान पनि सञ्चालन भइरहेको बताउँदै उनले मंसिरपछि अभियानको समीक्षाका साथै म्याद थप्ने विषयमा छलफल हुने बताए ।
पार्टीका प्रवक्ता मनिष सुमनले पनि केन्द्रीय समितिको बैठक बसेर अभियानको म्याद थप्ने बताए । ‘अहिले जिल्ला जिल्लामा अभियान सञ्चालित छन्, वडा तहसम्म यो अभियान चलिरहेको छ, मंसिर मसान्तसम्म सबै पालिकामा भएन भने म्याद थपिन्छ’, उनले बताए ।
अभियानले पार्टी चलायमान भएको उल्लेख उनले अभियानलाई निरन्तरता दिँदा नै फाइदा हुने बताए ।
जसपा नेपालले जनतासँग जसपा नेपाल आधारभूत सङ्गठन निर्माण अभियानमा सदस्यता वितरण, सङ्गठन निर्माण सँगसँगै पार्टीको सैद्धान्तिक एवं वैचारिक अवधारणालाई महत्वका साथ अगाडी बढाउन निर्णय गरेको छ । जसपा नेपालको आइतबार बसेको सचिवालय बैठकले अभियानको समीक्षा गरेको थियो । अभियानले पार्टीलाई संगठित र व्यवस्थित गरिरहेको निष्कर्ष निकालेको छ ।
अभियानलाई अझ बढी गतिशील र उपलब्धिपूर्ण बनाउन सम्पूर्ण अभियन्ताहरूले कार्यक्षेत्रमा रहेर क्रियाशील भई लाग्नुपर्ने बैठकले निकालेको निष्कर्षको सर्कुलर जिल्ला जिल्लामा पठाई सकेको सो पार्टीका प्रचार विभाग प्रमुख पूर्ण बस्नेतले बताए ।
साथै स्थानीय तहको उपनिर्वाचनमा जसपा नेपालले उम्मेदवारी दिएका क्षेत्रमा पार्टीलाई जिताउन सम्बन्धित क्षेत्रका नेता कार्यकर्ताहरूलाई सक्रियताका साथ परिचालित हुन आग्रह पनि गरिएको छ ।
