भारतमा सुरु भयो लोक सभा निर्वाचनको मतगणना

२२ जेठ, काठमाडौं । भारतको १८औं लोक सभा निर्वाचनको मतगणना सुरु भएको छ ।
पूर्वनिर्धारित समय अनुसार आज बिहानदेखि मत गणना सुरु भएको भारतीय सञ्चार माध्यमहरूले जनाएका छन् ।
५४२ सिटका लागि भएको निर्वाचनमा भाजपा नेतृत्वको एनडीए गठबन्धन र कांग्रेस नेतृत्वको इन्डिया गठबन्धन मुख्य प्रतिस्पर्धामा छन् ।
निर्वाचन सकिएलगत्तै सार्वजनिक भएका मत सर्वेक्षणले यसपटक पनि भाजपाको एनडीए गठबन्धनले बहुमत हासिल गर्ने देखाएको छ ।
मत सर्वेक्षणअनुसारकै नतिजा निस्किएमा नरेन्द्र मोदी तेस्रो कार्यकाल प्रधानमन्त्री बन्ने छन् ।
बहुमतका लागि २७२ सिट आवश्यक हुन्छ । तर, मत सर्वेक्षणले भाजपा नेतृत्वको एनडीए गठबन्धनले २८१ देखि ४०१ सिटसम्म ल्याउने देखाइएको छ ।
कांग्रेस नेतृत्वको विपक्षी गठबन्धनले १०७ देखि २०१ सिटसम्म ल्याउन सक्ने सर्वेक्षणले देखाएको छ ।