माओवादी प्रदेश २ को विवादमा केन्द्रले हस्तक्षेप गर्ने

काठमाडौं, मंसिर २९ गते
नेकपा माओवादी केन्द्र प्रदेश २ मा देखिएको विवादलाई केन्द्रले समाधान गर्ने भएको छ । प्रदेशले आफै मिलाउन नसके केन्द्रले हस्तक्षेप गर्ने तयारी भएको छ ।
माओवादी केन्द्रको सबै प्रदेशमा प्रदेश अधिवेशन भएपनि प्रदेश २ मा हुन सकेको छैन् ।
प्रदेश २ मा देखिएको विवादलाई लिएर माओवादी केन्द्रका नेता मातृका यादव, नारायणकाजी श्रेष्ठ, गिरीराजमणि पोखरेल, र रामकुमार शर्माले पार्टीका अध्यक्ष प्रचण्डलाई भेटेका छन् ।
छलफलमा सहभागी एक नेताका अनुसार त्यहाँ देखिएको विवादको विषयमा छलफलहरु भएको र पुस ३ गते अधिवेशन गरेर नेतृत्व चयन गर्ने पनि भनेको छ । त्यहाँको विवाद समाधानका लागि केन्द्रले प्रदेशसँग समन्वय गर्ने एक नेताले बताए ।
प्रदेश २ मा नारायणकाजी श्रेष्ठ र मातृका गुट सक्रिय छन् । दुवै गुट बीचको विवादले गर्दा पार्टीको संगठन बन्न सकिरहेको छैन । प्रदेश २ को अधिवेशन सप्तरी जिल्लाको विवादले गर्दा स्थगित भएको भनिएको छ ।
जिल्लामा अमर मण्डल र उमेश यादवबीचको टकरावले जिल्ला अधिवेशन हुन नसकेको कारण प्रदेशको अधिवेशन हुन नसकेको बताइएको छ