प्रदेश २ मा मन्त्री तथा प्रदेश कमिटी हेरफे हुँदै

जनता समाजवादी पार्टी नेपाल (जसपा)का अध्यक्ष उपेन्द्र यादवसहित शीर्ष नेताहरु प्रदेश २ को अस्थायी राजधानी जनकपुर पुगेका छन् । अध्यक्ष यादवसहित जसपाका संघीय परिषद् अध्यक्ष डा.बाबुराम भट्टराई, कार्यकारिणी सदस्य एवं कृषि तथा पशुपन्छी विकास मन्त्री महेन्द्र राय यादव, कार्यकारिणी सदस्य राजकिशोर यादवलगायतका नेताहरु सम्मिलित बैठक जनकपुरमा बसिरहेको छ ।
तत्कालीन समाजवादी पार्टी र राष्ट्रिय जनता पार्टी नेपालबीच एकीकरण भएपछि बनेको जसपाले प्रदेश समिति समायोजन गर्दा कात्तिक १५ गतेसम्मका लागि तदर्थ समिति बनाएको थियो । आज जसपा प्रदेश २ समितिलाई पूर्णता दिन बैठक बसेको हो ।
यसअघि जसपा नेपालका कार्यकारिणी सदस्य एवं प्रदेश २ का अर्थमन्त्री विजय यादव प्रदेश समितिको अध्यक्ष थिए । प्रदेश कमिटी हेरफेर गर्ने भएपछि उनले असोज २४ गते नै अध्यक्ष पदबाट राजीनामा दिएका थिए । उनले राजीनामा दिए पनि तत्कालका लागि जसपा प्रदेश २ को तदर्थ समिति गठन गरी कात्तिक १५ गतेसम्मका लागि उनलाई अध्यक्षकै जिम्मेवारी दिइएको थियो ।
जसपा प्रदेश २ का प्रदेशसभा सदस्य रामअषिश यादवले प्रदेश समितिको बारेमा छलफल गर्न शीर्ष नेताहरुको बैठक बसेको बताए । प्रदेश २ समितिमा कसलाई अध्यक्ष बनाउने भन्ने विषयमा शीर्ष नेताहरुले नै निर्णय गर्ने उनको भनाइ छ ।
त्यस्तै, प्रदेश २ सरकारमा सामेल जसपाका मन्त्रीहरु पनि हेरफेर हुने बताइएको छ । जसपाका एकजना कार्यकारिणी सदस्यका अनुसार प्रदेश २ सरकारमा माधवकुमार नेपाल नेतृत्वको नेकपा (एकीकृत समाजवादी) आउने भएपछि जसपाले मन्त्री हेरफेर गर्न लागेको हो ।
नेकपा (एकीकृत समाजवादी) बाट प्रदेश २ सरकारमा एकजना मन्त्री र एकजना राज्यमन्त्री जाने सहमति भएको छ । एउटा मन्त्रालय र अर्को राज्यमन्त्री लिएपछि नेकपा (एकीकृत समाजवादी) ले महत्त्वपूर्ण मन्त्रालयको माग गरेको छ ।
त्यसका लागि जसपा नेपालका अध्यक्ष उपेन्द्र यादवले प्रदेश २ सरकारका उद्योग, पर्यटन तथा वन मन्त्री रामनरेश राय यादव र कृषि राज्यमन्त्री योगेन्द्र राय यादवलाई राजीनामा दिन भनिसकेको स्रोतले जनाएको छ । यद्यपि हालसम्म उनीहरु राजीनामा दिन तयार भएका छैनन् ।
उद्योग मन्त्री रामनरेश राय यादवले सरकारमा राम्रो काम गर्न नसकेको गुनासो पार्टीमा व्याप्त छ । प्रदेश २ सरकारमा सबभन्दा कमजोर कार्य प्रगति उद्योग मन्त्रालयको रहेको कारण उनलाई हटाएर नेकपा (एकीकृत समाजवादी) लाई सो मन्त्रालय दिने तयारी भइरहेको छ ।
केन्द्रीय सरकारमा जसपाका कार्यकारिणी सदस्य महेन्द्र राय यादव मन्त्री भएपछि उनकै पक्षमा रहेका रामनरेश राय यादव प्रदेश सरकारमा रहनु हुँदैन भनेर पार्टीमा कुरा उठ्न थालेको छ ।
उनी आफूलाई मन्त्रीमा कायम राख्न अध्यक्ष उपेन्द्र यादवसँग कुरा गर्न भन्दै केही दिनदेखि काठमाडौंमा बसेका थिए । उनले अध्यक्ष यादवलगायत शीर्ष नेताहरुलाई भेटेर प्रदेश सरकारको अब धेरै समय बाँकी नरहेकाले आफूलाई नहटाउन आग्रह गरेको एक नेताले बताए । अध्यक्ष यादव आइतबार तराई मधेसतर्फ प्रस्थान गरेसँगै मन्त्री रामनरेश राय यादव पनि जनकपुर फर्केका छन् ।
हुन त प्रदेश २ का सामाजिक विकास मन्त्री नवलकिशोर साहको कार्यप्रगति पनि सन्तोषजनक छैन । उनको बारेमा पनि पार्टीका पटकपटक कुरा उठेको हो । कुनै कारणवश रामनरेश राय यादवले राजीनामा दिन मानेनन् भने नवलकिशोर साहलाई हटाउने सम्भावना रहेको पनि स्रोत बताउँछ । तर उनी तत्कालीन राजपाका नेता राजेन्द्र महतोको साथ छाडेर जसपामा बसेका कारण उनलाई हटाउन नमिल्ने एकथरीको दाबी छ । उनी पनि काठमाडौंमा पार्टीका अध्यक्षसहित शीर्ष नेताहरुलाई भेटेर हालै फर्किएका हुन् ।
मन्त्रीहरु नवलकिशोर साह र रामनरेश राय यादवले सरकार छाड्न नमाने सामाजिक विकास मन्त्रालयबाट शिक्षा मन्त्रालय अलग गरेर स्वास्थ्य मन्त्रालय नेकपा (एकीकृत समाजवादी) लाई दिने विषयमा पनि छलफल भइरहेको स्रोतको भनाइ छ ।
हाल बाँकी रहेको सामान्य प्रशासन तथा कानुन मन्त्रालय र वातावरण मन्त्रालयमध्ये कुनै एउटामा रामनरेश राय यादव वा नवलकिशोर साहमध्ये एकजनालाई सारेर उता नेकपा एकीकृत समाजवादी पार्टीलाई दिने विषयमा पनि छलफल भइरहेको छ ।
त्यस्तै, कृषि राज्यमन्त्री योगेन्द्र राय यादवको बारेमा पनि पार्टीका थुप्रै गुनासो आइरहेको छ । उनको काम पनि सन्तोषजनक नरहेको भन्दै प्रदेशसभा सदस्यहरुले पार्टीमा गुनासो गरेपछि उनलाई हटाउने तयारी भइरहेको एक नेताको दाबी छ । राज्यमन्त्री योगेन्द्र राय यादवलाई हटाएपछि कृषि राज्यमन्त्री, सामाजिक विकास राज्यमन्त्री र उद्योग राज्यमन्त्री गरी तीनवटा खाली हुनेछ । अर्थात् जसपाले दुईजना मन्त्री र तीनजना राज्यमन्त्री नियुक्त गर्न सक्छ ।
त्यसका लागि थुप्रै आकांक्षी शक्ति केन्द्रमा दौडधुप गरिरहेका छन् । सम्भवतः आजै मन्त्री तथा प्रदेश समितिको बारेमा टुङ्गो लगाइने छ । प्रदेश २ जसपा अध्यक्षका लागि जनकपुरधाम उपमहानगरपालिकाका मेयर लालकिशोर साह आकांक्षी छन् । उनलाई प्रदेश समितिको अध्यक्ष बनाउने सम्भावना प्रवल रहेको स्रोतले जनाएको छ ।
प्रदेश अध्यक्ष बन्नका लागि काठमाडौं आएर अध्यक्षसहित शीर्ष नेताहरुलाई भेटेर उनी आइतबारमात्र काठमाडौंबाट फर्केका छन् । सोमबार मन्त्रीको बारेमा टुङ्गो नलागेको खण्डमा प्रदेश कमिटीको मात्र भए पनि टुङ्गो लगाउने तयारीका साथ नेताहरु छलफलमा जुटेका छन् ।