काठमाडौँ । जनमत पार्टीका नेता एवं मधेस प्रदेशका मुख्यमन्त्री सतिश कुमार सिंहले मुख्यमन्त्री पदबाट दिएको राजीनामाबाट पछाडि हटेका छन् ।
जेनजी पुस्ताको आन्दोलनका कारण जनमत पार्टीका अध्यक्ष डा.सिके राउतले दिएको निर्देशनका आधारमा मुख्यमन्त्री सिंह आफ्नो पदबाट राजीनामा दिएको घोषणा गरेका थिए । तर अहिले देशमा नयाँ प्रधानमन्त्री नियुक्त भइसकेपछि उनी आफू नै मुख्यमन्त्री रहेको भन्न थालेका हुन् ।
भदौ २४ गते आन्दोलनले उग्र रूप लिएपछि उनले आफ्नो फेसबुकमार्फत राजीनामा दिएको घोषणा गरेका थिए । राजीनामा दिनका लागि पार्टीका अध्यक्ष राउतले उनलाई निर्देशन दिएका थिए । कैलाश मानसरोवरमा रहेका अध्यक्ष राउतले आफू पनि संसद् पदबाट राजीनामा दिएको घोषणा गरेका थिए ।
मुख्यमन्त्री सिंहले आफ्नो फेसबुकमा लेखेका थिए, ‘….नागरिकको ज्यान भन्दा ठुलो अरू केही छैन भने अटल विश्वासका साथ, जनताको अधिकार र भविष्यप्रति उत्तरदायी हुँदै म मधेस प्रदेशको मुख्यमन्त्री पदबाट राजीनामा गर्दछु ।’ ढढ
त्यति मात्र होइन उनले भनेका थिए, ‘म मुख्यमन्त्री रहँदा प्रत्यक्ष वा अप्रत्यक्ष रूपमा सहयोग र साथ दिनु हुने सम्पूर्णमा हृदयदेखि आभार व्यक्त गर्दछु । साथै यो महत्त्वपूर्ण जिम्मेवारी बहन गर्ने अवसर प्रदान गर्नु भएकोमा जनमत पार्टीका श्रद्धेय राष्ट्रिय अध्यक्ष माननीय डा. सिके राउतज्यूसहित पार्टीका सबै समिति, नेता, कार्यकर्ताहरूप्रति कृतज्ञता प्रकट गर्दछु ।
मुख्यमन्त्री सिंहले प्रेस विज्ञप्ति जारी गरेर राजीनामा दिए पनि उनले प्रदेश प्रमुख सुमित्रा सुवेदी भण्डारी समक्ष औपचारिक पत्र बुझाएका थिएनन् । त्यसैलाई आधार मानेर उनी आफू नै मुख्यमन्त्री रहेको भन्न थालेका छन् । उनी पुनः मुख्यमन्त्रीमा फर्किनका लागि वकिल तथा विभिन्न दलका नेताहरूसँग छलफलमा जुटेका छन् ।
मुख्यमन्त्री सिंहका प्रेस सल्लाहकार अवधेश झाले भदौ २४ गते मधेस भवनमा तोडफोड हुन थालेपछि आफ्नो राजीनामा घोषणाले त्यो साम्य हुन्छ कि भनेर मुख्यमन्त्री सिंहले राजीनामाको घोषणा गरेको स्पष्ट पारे । धनजनको धेरै क्षति नहोस् भनेर मुख्यमन्त्री सिंहले त्यो दिन आफ्नो फेसबुकबाट राजीनामा घोषणा गरेको उनको भनाई छ ।
‘मेरो राजीनामाले यदि अवस्था सहज हुन्छ, सबै कुरा शान्त हुन्छ भने म राजीनामा दिन तयार छु भन्दै मुख्यमन्त्री सिंहले राजीनाको घोषणा गर्नु भएको हो । अहिले फरक परिस्थिति भएको कारण अब के गर्ने भनेर त्यसको बारेमा उहाँ दलका नेता तथा वकिलहरूसँग छलफलमा जुट्नु भएको छ’, सल्लाहकार झाले भने ।
तर, जनमत पार्टीका अध्यक्ष राउतले आफूहरूले संसद् र सरकार सबै छाडेको बताएका छन् । हिजो आफ्नो फेसबुकमा लेख्दे उनले भनेका छन्, ‘मैले पद छोडेको भोलि पल्टै देश र मधेस स्वर्ग बन्नेछ, मैले छोडेको भोलि पल्टै १० लाख रोजगारी सिर्जना हुनेछ, मैले छोडेको भोलि पल्टै स्कुल र अस्पतालमा अन्तर्राष्ट्रिय स्तरको सेवा सुचारु हुनेछ, मैले छोडेको भोलि पल्टै आर्थिक समृद्धि आई मान्छे पिच्छै मकान र गाडी हुनेछ । मानौँ मैले छोडेको भोलि पल्टै र ऊ आउने बित्तिकै यी सब पूरा हुनेछन् । ल त, छोडी दिएको छु सांसद पद, सरकारी पद ! ल त, छोडी दिएको छु बाटो ! ल त, अब रातारात माथिका कुरा पूरा गरेर तपाईँ नै देखाउनोस् ।’
