लोहारपट्टी नगरपालिकामा व्यापक अनियमितता : एकवर्षमै खाजामा र इन्धनमाएक करोड बढी स्वाहा

महोत्तरीको लोहारपट्टी नगरपालिकामा खाजाखाना र इन्धन शीर्षकमा व्यापक अनियमितता भएको खुलेको छ । नगरपालिकाले खानाखाजा र इन्धनमा एकवर्षमै एक करोड बढी खर्च गरेको रहस्य खुलेको हो ।महालेखा परीक्षकको कार्यालयले सार्वजनिक गरेको ५८ औं प्रतिवेदन २०७८ मा लोहारपट्टी नगरपालिकाले आ.व २०७६/०७७ मा खाजाखानामा ७८ लाख २९ हजार र इन्धनमा ४० लाख ५० हजार रुपैयाँ कानुन विपरीत खर्च गरेको उल्लेख छ ।नगरपालिकाले विविध खर्च राखी खाजाखनामा ७८ लाख २९ हजार खर्च गरेको पाइएको हो ।जवकी स्थानीय सरकार सञ्चालन ऐन २०७४ को दफा ७१ बमोजिम व्ययको बजेट अनुमान आन्तरिक आयको परिधिभित्र रहेर औचित्यको आधारमा विविध खर्च गर्नुपर्ने तथा आर्थिक कार्यविधि नियमावली २०६४ को नियम ३६ (३) अनुसार खर्चको पुष्ट्याइ हुने प्रमाण, कागजात संलग्न गरेर मात्र खर्च लेख्नु पर्ने व्यवस्था छ ।तर, लोहारपट्टी नगरपालिकाले खाजाखाना तथा कार्यक्रम विविध तर्फ ७८ लाख २९ हजार खर्च गरेको हो । खर्च गरेको बिल पेश गरेपनि खर्च गर्नुपर्ने स्पष्ट आधार गर्ने गरेको नदेखिएको प्रतिवेदनमा उल्लेख छ ।यस्तै सार्वजनिक खर्चमा मितव्ययिता र प्रभावकारीता कायम गर्ने सम्बन्धि नीतिगत मार्गदर्शन २०७५ मा सवारी साधनको इन्धन, मर्मत खर्चमा एकरुपता ल्याउन निश्चित मापदण्ड बनाइ कार्यान्वयनमा ल्याउनुपर्ने साथै सरकारी सवारी साधन सरकारी काममा मात्र प्रयोग गर्ने, सरकारी सवारीसाधन अनाधिकृत व्यक्तिले प्रयोग नगर्ने जस्ता व्यवस्था छ ।तर, यस नगरपालिकाले सो व्यवस्थाको धज्जी उडाउँदै पदाधिकारीलाई इन्धनमा ५० हजार  र कार्यालय प्रयोजन इन्धनमा ४० लाख गरि ४० लाख ५० हजार एकवर्षमै स्वाहा गरेको  महालेखा परीक्षकको प्रतिवेदनमा देखाइएको छ ।
इन्धन खर्चको मापदण्ड तयार गरेको छैन भने सवारीसाध अनुसार वार्षिक इन्धन खर्च र उपयोगको विवरण खुल्ने गरि अभिलेख नराखेको भन्दै प्रतिवेदनमा इन्धन खर्चलाई मितव्यायी बनाउन कोटा निर्धारण गरि लगबुक राखेर मात्र खर्च लेख्न भनेको छ ।