जनकपुरधाम : प्रदेशको स्वास्थ्य नीति बनाउन सरकारले गठन गरेको कार्यदलले आफ्नो मस्यौदा आज सरकारलाई हस्तान्तरण गरेको छ । सामाजिक विकास मन्त्रालयले आयोजना गरेको कार्यक्रममा कार्यदलका संयोजक डा रामकेवल साहले सामाजिक विकासमन्त्री नवलकिशोर साहलाई बुझाउनुभएको थियो भने सोही अवसरमा मन्त्री साहले मुख्यमन्त्री लालबाबु राउत उक्त मस्यौदा हस्तान्तरण गर्नुभयो ।
कार्यदलले तैयार पारेको मस्यौदामा प्रदेश नं २ को स्वास्थ्य क्षेत्रमा देखिएका समस्या, सुधारका लागि गर्नुपर्ने उपाय तथा स्वास्थ्य क्षेत्रको पुनःसंरचनालगायतको सुझाव समेटिएको छ ।
उक्त समारोहमा मुख्यमन्त्री लालबाबु राउतले कार्यदलले तैयार पारेको मस्यौदाले प्रदेशको स्वास्थ्य अवस्थामा सुधार ल्याउन प्रदेश सरकारलाई मार्ग दर्शक हुने विश्वास व्यक्त गर्नुभयो । सरकारी नीतिकै कारण स्वास्थ्य क्षेत्र सोचअनुरुपको सफलता पाउन नसकेको उल्लेख गर्नुहुँदै उहाँले स्वास्थ्य क्षेत्रलाई विश्वासिलो बनाउन पुनःसंरचना आवश्यक रहेको उल्लेख गर्नुभयो ।
सो अवसरमा भौतिक पूर्वाधार विकासमन्त्री जीतेन्द्र सोनलले स्वास्थ्य नीतिको मस्यौदा तयार भए झै सरकारलाई आगामी दिनमा काम गर्न सबै क्षेत्रको नीति बनाउनु आवश्यक रहेको बताउनुभयो । उहाँले आगामी दिनमा सरकारले यस मस्यौदालाई प्रारम्भिक आधार बनाएर आफ्नो नीति तथा कार्यक्रम बनाउने विश्वास व्यक्त गर्नुभयो ।
सामाजिक विकासमन्त्री साहको अध्यक्षतामा भएको उक्त कार्यक्रममा सामाजिक विकास राज्यमन्त्री अभिराम शर्मा, नीति तथा योजना आयोगका उपाध्यक्ष डा भोगेन्द्र झासहितका वक्ताले मस्यौदामाथि आआफ्नो विचार राख्नुभएको थिए ।
