लोसपाबाट अलगिए बृषेश चन्द्रलाल

जनकपुरधाम, माघ २९ गते ।
महन्थ ठाकुर नेतृत्वलाई लामो समयदेखि साथ दिदैँ आएका प्रभावशाली नेता बृषेशचन्द्र लालले लोकतान्त्रिक समाजवादी पार्टी नेपाल (लोसपा नेपाल) बाट अलग भएका छन् ।
लालले ठाकुर नेतृत्वको लोसपा नेपाल परित्याग गरि पुरानो पार्टी तराई मधेस लोकतान्त्रिक पार्टी (तमलोपा) बाट राजनीतिक गतिविधि गर्ने भएका हुन् ।
लालले भने, ‘लोसपा संस्थागत रुपमा चल्न सकेन्, लोसपा मात्रै होइन जसपा पनि संस्थागत रुपमा चल्न सकेको अवस्था छैन, एउटा केपी ओलीको पछाडि लागेको छ भने अर्को पार्टी प्रचण्डजीको पछि लागेको अवस्था छ । मधेस आन्दोलनको मर्म र भावना बिपरित मधेसका नेताहरु सत्ता र कुर्सीका लागि ज्यान फाल्न थाले पछि मधेस आन्दोलनका आन्दोलनकारीहरूको भावनालाई सम्वोधन गर्न लोसपा छाडेको हुँ ।’
महन्थ ठाकुर र उपेन्द्र यादव नेतृत्वको पार्टीले मधेस केन्द्रित दलको पहिचान गुमाउँदै गएकाले पार्टी छाड्न विवश भएको उनले जनाएका हुन् ।
लालले स्थानीय तहको निर्वाचनमा उम्मेदवार तमलोपाबाट खडा गर्ने गरी गृहकार्य भइरहेको समेत बताए ।
लाल तत्कालिन राष्ट्रिय जनता पार्टी नेपालका तर्फबाट राष्ट्रियसभा सदस्यसमेत विजयी समेत भएका थिए ।