प्रदेश २ को स्वास्थ्य सम्बन्धी बनेको विधेयक प्रमाणिकरण

जनकपुरधाम, मंसिर ११ गते ।
प्रदेश २ का प्रदेश प्रमुख हरिशंकर मिश्रले स्वास्थ्य सेवा सम्बन्धी व्यवस्था गर्न बनेको विधेयक प्रमाणीकरण गरेका छन् । । शुक्रवार प्रदेश प्रमुख मिश्रले प्रदेशसभाबाट पारित भएर आएको विधेयक ‘स्वास्थ्य सेवा सम्बन्धमा व्यवस्था गर्न बनेको विधेयक’लाई नेपालको संविधानको धारा २०१ को उपधारा (४) बमोजिम प्रमाणीकरण गरेका छन् ।
१७ चैत २०७७ सालमा प्रदेशसभा सचिवालयमा दर्ता भएको उक्त विधेयक २६ असोजमा २०७८ मा प्रदेश सभाबाट पारित भएको थियो । स्वास्थ्य सेवा सम्बन्धी ऐन कार्यान्वयनमा आएसँगै प्रदेशको स्वास्थ्य अवस्थामा सुधार हुने जानकारहरुको भनाई छ । स्वास्थ्य क्षेत्रमा देखिएका विकृति विसंगति तथा हस्पिटल, चिकित्सकहरूले सर्वसाधारणबाट असुल गर्ने अनैतिक रकम लगायतका समस्यामा केही सुधार हुने अपेक्षा गरिएको छ ।
ऐनमा प्रत्येक सामुदायिक विद्यालयमा किशोर किशोरीलाई प्रजनन स्वास्थ्य सम्बन्धी सेवासहित अन्य स्वास्थ्य सम्बन्धी सेवा, शिक्षा दिन क्रमशः नर्सको व्यवस्था गर्नुपर्ने उल्लेख छ ।
निजी विद्यालयको हकमा भने स्वास्थ्य सेवा ऐन लागू भएको एक वर्षभित्र प्रत्येक विद्यालय अनमी वा स्टाफ नर्स राख्नुपर्ने अनिवार्य व्यवस्था गरेको छ । एक वर्ष भित्र निजी विद्यालयले विद्यालयमा स्टाफ नर्स वा अनमी नराखेको खण्डमा त्यस्ता विद्यालयको लाइसेन्स नै खारेज गरिने ऐनमा प्रावधान राखिएको छ ।