विनोद महतो
महेन्द्रनगर, साउन २८ ।
धनुषाको मिथिला नगरपालिका वडा नं. २ नक्टाझिजस्थित हिमालय युवा क्लवको आयोजनामा भईरहेको फुटबल प्रतियोगिता अन्तर्गत विहिवार भउको दोस्रो सेमिफाइनल खेलमा श्री रत्न ज्योति युवा क्लव रतनपुरले जित हासिल गरेको छ । जितसँगै रतनपुर फाइनलमा प्रवेश गरेको छ ।
दोस्रो सेमिफाइनल खेलमा बुद्ध युवा क्लव मरधर र श्री रत्न ज्योति युवा क्लव रतनपुरबीच निकै रोचक र कडा प्रतिस्पर्धाको खेल भएको थियो ।
खेलमा श्री रत्न ज्योति युवा क्लव रतनपुरले ३ गोल गरेका छन् भने बुद्ध युवा क्लव मरधर कुनै गोल गर्न सकेन् । सो खेलमा रतनपुरका सुरज थापा २ गोल र सागर मगरले १ गोल गरेका थिए । यता विहिवारको खेलमा रतनपुर टिमका खेलाडी ईन्द्र बहादुर तेलांग घाइते भएका छन् । दुई जना खेलाडीको खुट्टा फुटबललाई हान्ने क्रममा जुधेपछि खेलाडी तेलांगको खुट्टा भाँचिएको छ । धनुषाधाम नगरपालिका वडा नं.६ मालटोल घर भएका खेलाडी तेलांग मिथिला नगरपालिका वडा नं. ४ को रतनपुर टिमबाट खेलेको बताइएको छ । घाइते खेलाडीको अहिले जनकपुरमा उपचार भईरहेको बताइएको छ ।
यसैबीच अब फुटबल प्रतियोगिताको अन्तिम फाइनल खेल साउन ३० गते शनिवार हुने आयोजकले जनाएको छ । फाइनल खेलमा उपाधीका लागि हिमालय युवा क्लव (बी) टिम नक्टाझिज र श्री रत्न ज्योति युवा क्लव रतनपुरबीच रोचक र कडा प्रतिस्पधा देखिएको छ ।
