नागेन्द्र कुमार यादव
रामगाेपालपुर, २७ असोज
नेपालीहरूको महान चाड बडादशैंको आगमनसँगै महोत्तरी जिल्लाको रामगोपालपुर नगरपालिका र यहाँको मुख्य व्यापारिक केन्द्र रामगोपालपुर बजारलाई आकर्षक ढंगले सजाइएको छ। यस पटकको दशैंलाई विशेष र भव्य बनाउन नगरपालिका र स्थानीय व्यवसायीहरूको सक्रियतामा बजार क्षेत्रलाई नयाँ स्वरूप दिँदै दुलही झैं सिंगारिएको हो।
Oplus_16908288
रामगोपालपुर बजारका मुख्य चोक, सडक र पसलहरूमा रंगचंगी बिजुली बत्ती (झिलिमिली लाइट), तोरण र ध्वजापताका लगाइएका छन्। विशेष गरी साँझपख बजार क्षेत्र झिलिमिली बत्तीले गर्दा निकै मनमोहक देखिन थालेको छ, जसले गर्दा बजारमा चाडपर्वको छुट्टै रौनक थपेको छ।
दुर्गा पूजा र मेलाको विशेष तयारी
दशैंको अवसरमा रामगोपालपुरमा हरेक वर्ष झैं यस वर्ष पनि भव्य दुर्गा पूजा तथा मेलाको आयोजना गरिएको छ। घटस्थापनादेखि नै विभिन्न शक्तिपीठ र पूजा पण्डालहरूमा देवी दुर्गा भवानीको प्रतिमा स्थापना गरी विशेष पूजाअर्चना भइरहेको छ। बजार क्षेत्रमा निर्माण गरिएका आकर्षक पूजा पण्डाल र गेटहरूले सर्वसाधारण तथा भक्तजनहरूलाई आकर्षित गरिरहेका छन्।
Oplus_19005440
बजारमा किनमेल गर्नेको घुइँचो र पूजाकाे राैनक
बजार सिंगारिएसँगै रामगोपालपुर र वरपरका ग्रामीण क्षेत्रका नागरिकहरूको किनमेलका लागि रामगोपालपुर बजारमा ठूलो भीड लाग्न थालेको छ। दशैंका लागि लुगाकपडा, खाद्यान्न र पूजाका सामग्रीहरू किन्ने ग्राहकहरूको चहलपहलले व्यापारिक गतिविधिमा ठूलो सुधार ल्याएको स्थानीय व्यापारीहरू बताउँछन्। यस्तै, नेपाली संस्कृति झल्काउने परम्परागत लिङ्गे पिङहरू पनि ठाउँ-ठाउँमा हालिएका छन्, जसले बालबालिका र युवाहरूमा थप उत्साह जगाएको छ।
Oplus_19005440
सुरक्षा व्यवस्था कडा
चाडपर्वका बेला बजारमा हुन सक्ने अत्यधिक भीडभाड, चोरी तथा अवांछित गतिविधिहरूलाई रोक्न जिल्ला प्रशासन कार्यालय महोत्तरी र स्थानीय सुरक्षा निकायले रामगोपालपुर क्षेत्रमा सुरक्षा व्यवस्था चुस्त बनाएको छ। बजार तथा पूजा स्थलहरूमा नेपाल प्रहरी र सशस्त्र प्रहरी बलको विशेष टोली परिचालन गरिएको छ।
नगरपालिकाका जनप्रतिनिधि र स्थानीय अगुवाहरूले शान्तिपूर्ण र उल्लासमय वातावरणमा दशैं मनाउन सम्पूर्ण नगरवासीहरूमा शुभकामना समेत व्यक्त गरेका छन्। सिंगारिएको रामगोपालपुर बजारले यस वर्षको दशैंलाई साँच्चिकै ऐतिहासिक र उमङ्गले भरिपूर्ण बनाएको स्थानीयको भनाइ छ।
