महोत्तरी । नेपाल–भारत सीमा क्षेत्रमा तस्करी नियन्त्रणका लागि खटिएको महोत्तरी जिल्लाको पोखरभिण्डा बीओपीमाथि स्थानीयले गम्भीर आरोप लगाएका छन्। स्थानीयका अनुसार, दिनको समयमा सीमा क्षेत्रमा कडाइका साथ निगरानी गर्ने सुरक्षा संयन्त्रले रातको समयमा भने तस्करी नियन्त्रण गर्नुको सट्टा तस्करहरूसँग मिलेमतो गरी अवैध रूपमा सामान ओसारपसार गर्न सहज वातावरण बनाउने गरेको आरोप छ।
स्थानीयवासीको दाबीअनुसार,पोखरभिण्डा बीओपीका इन्चार्ज रविन्द्र पाल्पा खड्काको निर्देशनमा दिनभरि सीमा क्षेत्रमा निगरानी र चेकजाँच कडा देखाइने गरे पनि रात परेपछि तस्करीका लागि बाटो खुला गरिने गरेको छ। रातिको समयमा तस्करीका सामान सीमापार गराउन सुरक्षा निकायकै केही व्यक्तिको संलग्नता र संरक्षण रहने गरेको स्थानीयको आरोप छ।
Oplus_16908288
स्थानीयका अनुसार, ड्युटीमा खटिएका केही सुरक्षाकर्मीले रकम लिएर तस्करीका सामान ओसारपसार गर्न सहयोग गर्ने गरेको आरोपसमेत छ। अझ गम्भीर कुरा त के छ भने, सीमाबाट ओसारपसार हुने सामानको प्रभावकारी चेकजाँचसमेत नगरी आवतजावत गर्न दिने गरिएको स्थानीयको दाबी छ।
यस प्रकरणमा रघुनाथपुर क्षेत्रका डिएसपीको भूमिकामाथि समेत स्थानीयले प्रश्न उठाएका छन्। स्थानीयले तस्करी नियन्त्रण गर्ने जिम्मेवारीमा रहेका सुरक्षा अधिकारीहरूकै संरक्षण वा मिलेमतोमा यस्तो गतिविधि भइरहेको आरोप लगाउँदै निष्पक्ष छानबिनको माग गरेका छन्।
यदि स्थानीयले लगाएको आरोप सत्य हो भने, यो केवल सामान्य तस्करीको विषय नभई सीमा सुरक्षामा खटिएका सुरक्षा निकायको जिम्मेवारी र कार्यसम्पादनमाथि नै गम्भीर प्रश्न खडा हुने विषय हो। राज्यले सीमा सुरक्षाका लागि खटाएका सुरक्षाकर्मी नै तस्करी नियन्त्रणको सट्टा तस्करीलाई संरक्षण गर्न संलग्न भएको पुष्टि भएमा त्यस्तो गतिविधिमाथि तत्काल छानबिन गरी दोषीमाथि कडा कारबाही आवश्यक देखिन्छ।
स्थानीयले सम्बन्धित उच्च सुरक्षा निकाय र प्रशासनसमक्ष रातिको समयमा हुने सीमा गतिविधिको विशेष निगरानी गर्न, बीओपीको कार्यसम्पादनमाथि छानबिन गर्न तथा तस्करीसँग जोडिएका आरोपको सत्यतथ्य सार्वजनिक गर्न माग गरेका छन्।
