जसपा नेपालको केन्द्रीय समिति बैठकका लागि १० एजेन्डा तय

काठमाडौँ । जनता समाजवादी पार्टी नेपालकाे केन्द्रीय  समिति बैठकका लागि एजेन्डाहरू तय गरिएको छ । पार्टीको नव गठित केन्द्रीय समितिको बैठक आइतबारदेखि ललितपुरस्थित थसी बैंक्वेटमा सुरु हुँदैछ ।

बैठक साउन ३० गतेसम्म चल्नेछ । बैठकबाट पार्टीको आगामी वैचारिक, राजनीतिक, सङ्गठनात्मक कार्ययोजना तथा कार्यक्रमलगायतका विषयहरुमा छलफल गरी आवश्यक निर्णय हुने जनाइएको छ । गत जेठ अन्तिममा महाधिवेशन सम्पन्न गरेको पार्टीको पहिलो बैठकमा केन्द्रीय सदस्यहरुले पद तथा गोपनियताको शपथ पनि लिने छन् ।

जेठ २८ देखि ३० गतेसम्म जनकपुरमा पार्टीको महाधिवेशन सम्पन्न भएको थियो । सो महाधिवेशनले केन्द्रीय समिति चयन गर्ने जिम्मेवारी पार्टीका अध्यक्ष उपेन्द्र यादवलाई दिएको थियो । अध्यक्ष यादवले असार २७ गते नौ जना कार्यकारिणी सदस्यसहित २१५ सदस्यीय केन्द्रीय समितिको घोषणा गरेका थिए ।

पार्टी अध्यक्ष यादवका निजी सचिव महेश चौरसियाले दिएको जानकारी अनुसार बैठकका लागि १० वटा एजेन्डा र कार्यसूचीहरू तय गरिएको छ । यस्ता छन् बैठकका एजेन्डा:

१. वर्तमान भू-राजनीतिक परिस्थिति र नेपालको परराष्ट्र नीति तथा सम्बन्ध ।

२. नेपालको वर्तमान राष्ट्रिय राजनीतिक सन्दर्भमा हाम्रो पार्टीको भूमिका ।

३. नेपालको सन्दर्भमा पहिचान र राष्ट्रिय जातीय मुक्तिको सवाल ।

४. नेपालको सन्दर्भमा समाजवाद सम्बन्धी अवधारणा |

५. जनता समाजवादी पार्टी, नेपालका आदर्श, वैचारिक एवम् सैद्धान्तिक अवधारणा ।

६. संविधान संशोधनको आवश्यकता र अपरिहार्यता सम्बन्धमा ।

७. स्थानीय तह (२) प्रदेश सभा र (३) संसद्मा पार्टीको भूमिका ।

८. पार्टी विस्तार तथा सुदृढीकरण कार्ययोजना सम्बन्धमा ।

९. देशव्यापी रूपमा जनपरिचालन अभियान (सदस्यता वितरण, संगठन निर्माण र परिचालन, प्रशिक्षण, सेमिनार, गोष्ठी, जनसभालगायतका आवश्यक कार्यक्रमहरू) । उपरोक्त सम्बन्धमा कार्ययोजना तथा कार्यक्रम निर्माण लगायत सम्बन्धमा ।

१०. उपरोक्त अभियान सम्बन्धी कार्यक्रमहरू सम्पन्न गर्न समय अवधि निर्धारण गर्ने र केन्द्रीय समितिमा रहनु भएका प्रत्येक सदस्यहरूलाई जिल्ला / महानगर/नगर लगायत स्थानीय तहहरूको अभियन्ताको रूपमा जिम्मेवारी एवम् दायित्व तोक्ने सम्बन्धमा ।