गोपाल झा
महोत्तरी असोज २५ गते
महोत्तरीबाट ४ सय किलोभन्दा बढी प्रतिबन्धित लागूऔषध गाँजासहित एक जना पक्राउ परेका छन् ।
महोत्तरीको जलेश्वरबाट२७ पोकामा रहेको चार सय पाँच किलो प्रतिबन्धित लागूऔषध गाँजासहित प्रहरीले एकजनालाई पक्राउ गरेको छ । बुधबार राति जलेश्वर बाट बखरी तर्फ जाँदै गरेको क्याम्पस रोडस्थित फर्निचरको अगाडिबाट प्रहरीले ना.६ ख ७३७४ नम्बर को ट्रकमा लुकाएर राखेको अवस्थामा उक्त परिमाणको गाँजा बरामद गरेको हो ।
बुधबार मध्यरात खाली ट्रक लिएर घुमिरहेको देखेपछी शंकालागेमा अस्थायी प्रहरी पोस्ट नगरपालिकाबाट खटिएको प्रहरी टोलीले उक्त ट्रकलाई चेकजाँच गर्दा मालसामान राख्ने स्थानमा फल्स ठाउँ बनाई लुकाइछिपाई राखेको अवस्थामा प्रतिबन्धित लागूऔषध गाँजाको पोकाहरु फेला पारेपछि ट्रकचालक फरार भएका थिए । ट्रकचालक फरार भएपनी सहचालक मकवानपुर जिल्ला थाहा नगरपालिका- २ का रामबहादुर थिङको छोरा २२ वर्षीय विशाल थिङ भने पक्राउ परेको प्रहरीले जनाएका छन् ।
पक्राउ परेको थिङसँग थप अनुसन्धान भइरहेको जिल्ला प्रहरी कार्यालय महोत्तरीका प्रहरी प्रवक्ता डिएसपी दिलीपकुमार गिरीले जानकारी दिए ।
प्रहरीले लागूऔषध गाँजासहित ट्रक र ट्रक सह चालक थिङ्गलाई पक्राउ गरी आवश्यक कारबाहीको लागि जिल्ला प्रहरी कार्यालयमा राखेर थप अनुसन्धान भइरहेको बताएका हुन् । उनले महोत्तरी प्रहरीले गाँजा नियन्त्रणका लागि विशेष अभियान चलाइरहेको बताएका हुन् ।
महोत्तरीमा विभिन्न जिल्लाबाट गाँजा आयात भई दशगजा हुँदै भारत प्रवेश गर्ने र स्थानीय बजारमा समेत बेचबिखन हुने जानकारीअनुसार पछिल्लो समय यस्ता गतिविधिउपर महोत्तरी प्रहरीले विशेष निगरानी बढाएको छ ।
