जनकपुरधा, २६ असोज । जनता समाजवादी पार्टी नेपाल मधेस प्रदेश अधिवेशनको तयारी पूरा भएको जनाइएको छ ।
सोमबार (भोलि) बाट सुरु हुने अधिवेशनको सम्पूर्ण तयारी पूरा भएको प्रदेश अध्यक्ष बालकिशोर प्रसाद यादवले पत्रकार सम्मेलनमार्फत् जानकारी गराएका हुन् ।
पहिलो पटक हुने लागेको एकताको प्रथम अधिवेशनबाट ९ पदाधिकारीसहित ५१ सदस्यीय प्रदेश समिति चयन गरिने अध्यक्ष यादवले बताए । उनले भने, ‘अधिवेशनमा प्रदेशका ८ वटै जिल्लाबाट करिब ५ सय बढी प्रतिनिधि र एक सय पर्यवेक्षक सहभागी हुने छन् ।’ २ सय मा एक जना प्रतिनिधि छनौट गरिएको बताइएको छ ।
उनका अनुसार अधिवेशनले परिवर्तित सन्दर्भमा संविधान संशोधन, जनसंख्याको आधारमा निर्वाचन प्रणाली र अधिकार तथा पहिचानको आन्दोलनको औचित्यलाई थप पुष्टि गर्नेछ ।
अधिवेशन महेन्द्र नारायण निधि मिथिला संस्कृति केन्द्रमा आयोजना हुनेछ । यस अधिवेशनबाट एक जना अध्यक्ष, तीन उपाध्यक्ष, एक मुख्य सचिव, तीन सचिव र एक कोषाध्यक्ष चयन गरिनेछ भने बाँकी १५ प्रतिशत सदस्य पछि मनोनयन मार्फत चयन गरिनेछ ।
अध्यक्ष यादवले वडा, पालिका र जिल्ला अधिवेशनहरू सम्पन्न भइसकेकाले अब प्रदेश अधिवेशन मार्फत संगठन अझ सुदृढ हुने बताए ।
अधिवेशनले मधेशको राजनीतिक अधिकार, समावेशी प्रतिनिधित्व र पहिचानको आन्दोलनलाई अझ बलियो बनाउने विश्वास व्यक्त गरे ।
