बेरुत —इजरायलले लेबनानमा सोमबार गरेको आक्रमणमा कम्तीमा १० जनाको ज्यान गएको छ । इजरायली सीमानजिकैको बिन्ट जेबिलमा इजरायली रक्षा बल (आईडीएफ) ले गरेको आक्रमणमा १० अग्नीनियन्त्रक मारिएका सीएनएनले जनाएको छ । लेबनानी स्वास्थ्य मन्त्रालयका अनुसार आक्रमणमा ९ जना घाइते भएका छन् ।
इजरायलले प्यालेस्टिनी समूह हमासविरुद्ध एक वर्षअघि सुरू गरेको आक्रमण अझै जारी छ । २०२३ अक्टोबर ७ मा हमासले उत्तरी इजरायलमा गरेको आक्रमणमा १२ सयले ज्यान गुमाएका थिए । त्यसका साथै, हमासले २ सय ५१ जनालाई बन्धन बनाएर लगेको थियो । त्यसको प्रतिक्रियामा इजरायलले गाजमा सुरु गरेको हवाई आक्रमण केही सातायता लेबनानसम्म फैलिएको छ
पछिल्लो समय आईडीएफले हमाससँगै लेबनानी लडाकु समूह हेजबुल्लाहलाई लक्षित गरी आक्रमण गरेको छ । एक वर्ष लामो युद्धका क्रममा गाजामा मात्रै ४२ हजार ५ सय भन्दा बढीको ज्यान गइसकेको छ, त्यसमध्ये १६ हजार ५ सय भन्दाबढी बालबालिका छन् । मारिनेमध्ये कतिपय स्वास्थ्यकर्मी र पत्रकार छन् ।
आक्रमणका कारण करिब ९७ हजार घाइते भएका छन् । गाजामा हमासद्वारा सञ्चालित स्वास्थ्य मन्त्रालयका अनुसार कम्तीमा २३ लाख प्यालेस्टिनी युद्धका कारण विस्थापित भइसकेका छन् । एक वर्षको अवधिका पटकपटक युद्धविरामका लागि पहलहरू भए पनि ती असफल भएका छन् ।
