काठमाडौँ । नेपाली कांग्रेस महासमिति बैठकमा हस्ताक्षर संकलन गरिएको हिन्दु राज्य पुनर्स्थापनासम्बन्धी विषय केन्द्रीय समिति बैठकको निर्णयमा लेखिनुपर्ने भन्दै लफडा भएको छ ।
आइतबार बसेको केन्द्रीय समिति बैठकमा केन्द्रीय सदस्यहरूले बैठकको निर्णयमा हिन्दु राज्यको विषयमा उल्लेख गर्नुपर्ने माग गरे । केन्द्रीय सदस्य शंकर भण्डारीले आफूहरूले त्यत्रो दुख गरेको विषय निर्णयमा लेखिनुपर्ने भन्दै माग गरे । नभए नोट अफ डिसेन्ट लिने उनले चेतावनी दिए । भण्डारीलाई देवेन्द्रराज कँडेल‚ सिता देवकोटा लगायत केन्द्रीय सदस्यहरूले साथ दिएका थिए ।
त्यसको प्रतोरधमा विमलेन्द्र निधि‚ कृष्णकिशोर घिमिरे लगायत केन्द्रीय सदस्यहरू निस्किए । निधिले महामन्त्रीहरूको आधिकारिक प्रतिवेदन पनि नभएको र कांग्रेसको लाइननै नभएको विषयमा केको निर्णय भन्दै थर्काएका थिए ।
त्यसपश्चात् देउवाले हस्ताक्षर संकलन गरेकोमा धन्यवाद भन्दै बैठक सकिएको घोषणा गरिदिए ।
