उत्कृष्ट फर्ममा नेपाल, पिनएजीमाथि ९ विकेटको सानदार जित

उत्कृष्ट फर्मममा रहेको नेपालले पपुवा न्युगिनी (पिएनजी)लाई नौ विकेटले हराएको छ । ९६ रनको लक्ष्य पछ्याएको नेपालले विस्फोटक ब्याटिङ गर्दै ७.४ ओभरमा एक विकेटको क्षतिमा एक सय रन बनायो ।
ओपनरद्वय आसिफ सेख र कुशल भुर्तेलको विस्फोटक ब्याटिङ मद्यतमा नेपालले पिएनजीको लक्ष्य आठौँ ओभरभित्रै भेट्टाएको हो । आसिफले २१ बलमा ५३ रन बनाए । करिअरको आठौँ अर्धशतक बनाउने क्रममा उनले तीन छक्का र आठ चौका प्रहार गरे ।
कुशल भुर्तेलले दुई छक्का र चार चौकाको मद्यतमा १४ बलमा ३३ रन बनाए । नेपालले उनको मात्र विकेट गुमायो । उनी आउट भएपछि आएका कुशल मल्लले १३ बलमा एक छक्का र एक चौकाको मद्यतमा १२ रन बनाए । आसिफ र कुशल मल्ल नटआउट रहे ।
त्यसअघि सन्दीप लामिछानेको घातक बलिङका कारण पपुवा न्युगिनी ९५ रनमा अलआउट भएको थियो । स्पिनरहरू हावी भएको खेलमा पिएनजी ३२ ओभरमै समेटियो ।
पिएनजीको ब्याटिङ अर्डर ध्वस्त पार्ने क्रममा सन्दीपले दश ओभरमा २५ रन दिएर पाँच विकेट लिए । उनले अन्तिम बलमा सेमो कामेयालाई बोल्ड गर्दै आफ्नो पाँच विकेट पूरा गरे ।
यससँगै उनी सबैभन्दा चाँडो एक सय विकेट लिने विश्वकीर्तिमानको पनि नजिक पुगेका छन् । उनले ९८ विकेट लिइसकेका छन् ।
आजको खेलमा नेपालले टस जितेपछि कप्तान रोहितकुमार पौडेलले फिल्डिङ रोजेका थिए । उनको निर्णयलाई सही सावित गर्दै नेपाली स्पिनरले धारिलो बलिङ गरे । सन्दीपको पाँचका साथै, ललितनारायण राजवंशी र कुशल मल्लले दुई–दुई विकेट लिए । यस्तै, सोमपाल कामीले एक विकेट लिए ।