विनोद महतो
महेन्द्रनगर, असोज २१ ।
विजया दशमी २०७८ को अवसरमा धनुषाको मिथिला नगरपालिका वडा नं. ५ विश्रामपुरमा भईरहेको मैत्रीपूर्ण फुटलबल प्रतियोगिताको उपाधीका लागि फाइनलमा विश्रामपुर ‘बी’ टिम र धारापनी स्कुल टोलको टिमबीच भिडन्त हुने भएको छ । प्रतियोगिताको फाइनल खेल असोज २३ गते हुनेछ ।
प्रतियोगिता अन्तर्गत विहिवार भएको दोस्रो सेमिफाइनल खेलमा धारापानी स्कुल टोलका टिमले आयोजक विश्रामपुर ‘ए’ टिमलाई ३ गोलले पराजित गर्दै फाइनलको यात्रा तय गरेको छ । सो खेलमा धारापनी स्कुल टोलले विश्रामपुर ‘ए’ टिमलाई ० का विरुद्ध ३ गोलले पराजित गरेको छ ।
धारापनी स्कुल टोलका लागि जर्सी नं. ७ का खेलाडी आशिष मगर १ गोल, जर्सी नं. १० का सगुन मगर १ गोल र जर्सी नं. १३ का अभिषेक बर्माले १ गोल गरेका थिए । खेलको अन्तिमसम्म प्रयास गर्दा पनि विश्रामपुर ‘ए’ टिमका खेलाडीहरुले कुनै गोल फर्काउन सकेको थिएन ।
विहिवारको खेलमा योगेन्द्र यादवले एम्पायर तथा राजेश भुजेल र हेम बलम्पाकीले लाइन्सम्यानको रुपमा खेलाएको आयोजक विश्रामपुर युथ क्लवका अध्यक्ष दिलबहादुर मगरले जानकारी दिएका छन् ।
सो प्रतियोगिताको प्रथम पुरस्कार १० हजार र दोस्रो पुरस्कार ५ हजार रहेको छ भने ट्रफी र मेडल समेत प्रदान गरिने आयोजकले जनाएको छ ।
