चट्याङ लागेर एकको मृत्यु, एक घाइते

प्रतिक्षा खबर
बारा, भदौ ३० गते
बारामा भारी वर्षासँगै परेको चट्याङ लागेर एकजनाको मृत्यु भएको छ भने एकजना घाइते भएका छन् ।
मृत्यु हुनेमा बाराको जितपुरसिमरा उपमहानगरपालिका १४ का अन्दाजी ४० वर्षीय धर्मप्रसाद राय चौधरी रहेको प्रहरीले जनाएको छ ।
प्रहरीका अनुसार उनी दुधौरा खोलामा टायर गाडामा बालुवा लोड गरिरहेको अवस्थामा चट्याङ् लाग्दा चौधरीको मृत्यु भएको छ ।
चट्याङ् लागेर गम्भिर घाइते भएका चौधरीलाई स्थानीय डुमरवाना पोलिक्लिनिकमा उपचारका लागि लगिएकोमा त्यहीँ उनको मृत्यु भएको जिल्ला प्रहरी कार्यालय बाराले जनाएको छ ।
यस्तै सोही टायर गाडामा बालुवा लोड गरिरहेका अन्दाजी २७ वर्षिय तेतर माझी पनि सामान्य घाइते भएका छन् ।
घाइते माझीको सोही क्लिनीकमा उपचार भइरहेको जिल्ला प्रहरी कार्यालय बाराका प्रहरी प्रबक्ता एवम् प्रहरी नायब उपरिक्षक गौतम मिश्राले जानकारी दिए ।