जनकपुरधाम, चैत २७ । त्रिभूवन विश्व विद्यालय (टियु) विश्वविद्यालय प्रध्यापक संघ राराब क्याम्पस इकाई समितिले आफ्नै संगठनका अध्यक्ष र सचिवमाथि आक्षेप लगाउँदै पठन पाठन अवरुद्ध गर्ने चेतावनी दिएको छ ।
प्रध्यापक संघले निर्वतमान क्याम्पस प्रमुख प्रदीपकुमार प्रसादलाई कारवाही गराउने प्रपञ्चमा वर्तमान क्याम्पस प्रमुख प्रा.डा. बसन्तकुमार लालकर्ण लागेको अध्यक्ष सचिव सहितले जारी गरेको विज्ञप्तिमा आरोप लगाइएको छ भने प्रध्यापक संघकै सदस्यहरुले क्याम्पस प्रमुख कर्णलाई बदनाम गर्न सो विज्ञप्ति प्रकाशन गरिएको आरोप लगाइएको छ
निवर्तमान क्याम्पस प्रमुख प्रदीपकुमार क्याम्पस प्रमुखको पदमा रहँदा पदीय दायित्व निर्वाह गर्ने क्रममा परेको मुद्दामा उच्च अदालत जनकपुरधामले उनलाई क्याम्पस प्रमुखको हैसियतले दोषी देखाई उनको विपक्षमा फैसला गरेको थियो ।
प्रध्यापक संघका अध्यक्ष र सचिवले जारी गरेको विज्ञप्तिमा क्याम्पस प्रमुख कर्ण नै गल्ती गरेको स्पष्ट रुपमा आरोप लगाइएको छ । तर, सदस्यहरुले जारी गरेको विज्ञप्तिमा क्याम्पसमा सुधार ल्याउने, शैक्षिक गतिविधि बढाउन प्रयासरत्त रहेको क्याम्पस प्रमुख माथि यस्तो लांच्छना लगाउँनु दुर्भाग्यपूर्ण रहेको बताइएको छ ।
राराब क्याम्पसबाट तलव सेवा सुविधा प्राप्त गर्ने अनि निजी कलेजमा सम्पूर्ण समय विताउने मानसिकता बोकेका प्रध्यापकहरुकै कारण राराब क्याम्पसको अवस्था दिनप्रतिदिन खस्किदै गएको आरोप पटक पटक लाग्दै आएको छ ।
प्रध्यापक संघका अध्यक्ष र सचिवले जारी गरेको विज्ञप्तिमा २८ गते देखि आन्दोलनमा जाने चेतावनी दिएकै बेला अर्का टोलीले समेत क्याम्पस प्रमुखलाई बदनाम गर्ने प्रयास गरिए पठन पाठन अवरुद्ध गर्ने चेतावनी दिएका छन् । ११ सदस्यीय प्रध्यापक संघ राराब इकाई समितिमा ६ जना अध्यक्ष र सचिवको खेमा मा छन् भने पाँच जना अर्कौ खेमा बनाएका छन् ।
स्रोतका अनुसार राराब क्याम्पसबाट तलव सेवा सुविधा खाएर निजी कलेजमा पठन पाठन गराउने प्रध्यापकहरु अध्यक्ष र सचिवको खेमामा रहेको र राराबमै पठन पाठन गराउनेहरु सदस्यहरुको खेमा रहेको छ ।
राराब कलेजमा पठन पाठन शुरु, नयाँ विद्यार्थी भर्ना लगायतका सुधार र उन्नतिका समयमा यहाँका केही निजी कलेजहरु प्रध्यापक र विद्यार्थीलाई उचालेर राराब कलेजलाई प्रभावित गर्ने गरेको देखिएको विद्यार्थीहरुकै भनाई छ । राराब कलेज, राजर्षि जनक विश्व विद्यालय लगायतमा ती कलेजहरुले मोटो रकम खर्च गरेर एजेन्टहरु नै खटाएका विद्यार्थीहरुको आरोप छ ।
