तेहरान । लेबनानको सशस्त्र समूह हिजबुल्लाहका नेता हसन नसरल्लाहको मृत्युपछि इरानले संयुक्त राष्ट्रसङ्घ (युएन)को सुरक्षा परिषद्को बैठक बोलाउन माग गरेको छ । यूएनका लागि इरानका राजदूत आमिर एरवानीले परिषद्का १५ सदस्यलाई पत्र लेखेका छन् । यसमा उनले आफ्नो देशको कूटनीतिक परिसर वा कुनै राजदूतमाथि कुनै हमला भएमा तेहरानले सहन नसक्ने चेतावनी दिएका छन् ।
‘इरानले अन्तर्राष्ट्रिय कानुन अन्तर्गत आफ्नो अधिकार प्रयोग गर्न बिलकुल हिचकिचाउने छैन । राष्ट्रको रक्षा र राष्ट्रिय सुरक्षासँग सम्बन्धित सबै मामिलाहरूको रक्षा गर्न इरानले हर सम्भव कदम चाल्नेछ’ इरवानीले भनेका छन् ।
‘हामी सुरक्षा परिषद्लाई इजरायलविरुद्ध निर्णायक निर्णय लिन अपील गर्दछौं, ताकि इरानलाई युद्धमा धकेल्ने अवस्थाबाट बच्न सकियोस्’ पत्रमा अझ अगाडि उनी भन्छन् । इरानले लामो समयदेखि हिजबुल्लाहलाई आर्थिक र सैन्य सहयोग गर्दै आएको छ । यसअघि इरानका सर्वोच्च नेता आयतोल्लाह खामेनीले नसरल्लाहको मृत्युको बदला लिने बताएका थिए ।
