काठमाडौं । देशभर जेनजी आन्दोलनमा भएको सरकारी दमनपछि उत्पन्न परिस्थितिप्रति दु:ख व्यक्त गर्दै नेपाल विद्युत प्राधिकरणका पूर्व कार्यकारी निर्देशक कुलमान घिसिङले संयमता अपनाउन आग्रह गरेका छन्।
उनले मंगलबार जारी अपिलमार्फत निजी तथा सार्वजनिक सम्पत्तिमा क्षति नगर्न आग्रह गर्दै दीर्घकालीन सुधार र सकारात्मक परिवर्तनतर्फ अघि बढ्नुपर्नेमा जोड दिएका छन्।
उनले भनेका छन्, ‘प्रधानमन्त्रीको राजीनामा स्वीकृत भइसकेको अवस्थामा अब संयमित हुने समय आएको छ। सार्वजनिक सम्पत्ति तपाईं हाम्रै करबाट निर्माण भएको हो र पुनर्निर्माणमा पनि हाम्रै पैसा खर्च हुने भएकाले यसलाई जोगाउन सबैलाई अनुरोध गर्दछु।’
घिसिङले आन्दोलनमा सहाभागी युवापुस्ता, संलग्न संस्था र नागरिक समाजलाई धैर्य, आत्ममूल्यांकन र सहकार्यका भावनासहित अघि बढ्न आह्वान गरेका छन्। अपिलमा उनले विधिसम्मत र विवेकसम्मत बाटो अपनाउनुपर्ने उल्लेख गर्दै मध्यावधि निर्वाचनमार्फत नयाँ राजनीतिक निकास खोज्नुपर्ने आवश्यकता औंल्याएका छन्।
‘जेनजी सहित अन्तरिम चुनावी सरकार गठन गरेर राष्ट्रलाई विद्यमान संकटबाट निकास दिन आवश्यक छ,’ घिसिङले भनेका छन्, ‘यो कालो समयलाई चिर्दै उज्यालो नेपाल सम्भव छ, हामी सबै मिलेर यसलाई सार्थक बनाउन सक्छौं।’
