मस्को । गएको साढे २ वर्षभन्दा बढी समयदेखि रुस–युक्रेनबिच युद्ध चलिरहेको छ । युद्धबाट यी दुवै देश पछाडि हट्न तयार छैनन् ।
हालैका दिनमा रुसी भूभागमा युक्रेनी सेनाको घुसपैठको खबरहरू आइरहेका छन् । यसैबिच युक्रेनले रुसमाथि अहिलेसम्मकै सबैभन्दा ठुलो ड्रोन आक्रमण गरेको बताइएको छ । रुसी रक्षा बलका अधिकारीहरूले रुसको राजधानी मस्को क्षेत्रमा मात्रै ११ ड्रोन नष्ट गरेको आरोप लगाएका छन् । देशैभरि रातारात ४५ ड्रोन खसालेका रुसले बताएको छ ।
अधिकारीका अनुसार ४५ ड्रोनमध्ये ११ वटा मस्कोमा, २३ वटा ब्रायान्स्कको सीमा क्षेत्रमा, ६ वटा बेल्गोरोड क्षेत्रमा, तीन वटा कालुगामा र दुई वटा कुस्र्क क्षेत्रमा नष्ट गरिएको छ । केही ड्रोनहरू पोडोल्स्क सहरमा ध्वस्त भएको मस्कोका मेयर सर्गेई सोब्यानिनले बताए । मस्कोमा आक्रमणको यो अहिलेसम्मकै ठुलो प्रयास भएको उनको भनाइ थियो । मस्कोको तहगत प्रतिरक्षा प्रणालीका कारण ड्रोन आक्रमणलाई सफलतापूर्वक विफल पार्न सकिएको पनि उनले बताए ।
यी आक्रमणमा कोही पनि घाइते नभएको बताइएको छ । ड्रोन आक्रमणका कारण मस्कोको भानुकोभो, डोमोडेडोभा र झुकोवस्की विमानस्थलमा चार घण्टासम्म उडान प्रभावित भएको थियो ।
अगस्ट ६ मा मस्कोले किभमाथि हमला गर्न पश्चिमी रकेट प्रयोग गरेको आरोप रुसले लगाएको थियो । उनले कुस्र्क क्षेत्रको सेम नदीस्थित पुलमा पश्चिमी हतियारले निशाना बनाएको बताए । युक्रेनी सेनाले पश्चिमी रुसको भूभागमा आफ्नो घुसपैठ बढाइरहँदा दुई देशबिच तनाव बढ्दै गएको छ । दुवै तर्फबाट लगातार आक्रमण भैरहेका छन् ।
